Бу күннэргэ Өймөкөөн улууһун икки бөдөҥ нэһилиэгин Томтору уонна Өймөкөөнү ситимниир айан суола быстар мөлтөх туруктаммытын туһунан дьон олохтоох дьаһалтаҕа биллэрэн, тустаах дьаһалы ылалларыгар көрдөспүттэрэ.
Бу боппуруос хайдах быһаарыллан эрэрин туһунан улуустааҕы дьаһалта Инфраструктураны сайыннарыы уонна тэрээһин-правовой хааччыйыы сулууспатын салайааччыта Михаил Бурцев маннык иһитиннэрдэ:
— Нэдиэлэ саҥатыгар бу боппуруоһу улуустааҕы быылаанныыр мунньахха Өймөкөөн нэһилиэгин баһылыга Павел Васильев туруорсубута. Бу күннэргэ биһиги сулууспабыт хапытаалынай тутууга отделын салайааччыта Павел Березкин уонна тэрилтэ суол хаһаайыстыбатыгар эспиэрэ Лариса Скрыбыкина Үчүгэй нэһилиэгэр эбийиэктэри билсэ сылдьар кэмнэригэр Өймөкөөн уонна Томтор нэһилиэктэрин ситимниир айан суолун эмиэ көрөн-билсэн кэлэллэригэр сорудахтаммыта. Ол түмүгэр бу айан суолугар туһуламмыт кэккэ быһаарыыны ыллыбыт. Бастатан туран, оҥоһуллуохтаах үлэ кээмэйин быһаарыыга анал симиэтэ оҥоһуллуоҕа. Бу докумуоҥҥа олоҕуран, ааҕыы-суот түмүгэр төһө үп наадата биллиэҕэ. Ол кэнниттэн улуустааҕы Суолу оҥоруу пуондатыттан үбүлээһини көрөн, өрөмүөн үлэтин кэмигэр ыытыахпыт.
Маны таһынан, 2022 сыллаахха Өймөкөөн нэһилиэгэр Байаҕантай улууһун ыһыаҕын көрсө суол бэлиэлэрин туруорууга туһуламмыт дьаһал тахсыбыта. Онно анаан оҥоһуллубут бырайыак сүнньүнэн ол бэлиэлэр айан суола өрөмүөннэнэр кэмигэр эмиэ туруоруллуохтара.
Төрүт нэһилиэгин 10 км суолугар бэдэрээччит Яна Васильевна Долженкова ИП-та кураан күннэри баттаһан, сайын устата өрөмүөн үлэтин ыытыаҕа.
Өймөкөөн улууһун пресс-сулууспата