Сордоҥноох нэһилиэгэр “Кэнчээри” уһуйааҥҥа бу күннэргэ тэрилтэ дьиэтигэр сыһыары саҥа куукуна уонна сылаас ыскылаат тутуута ыытыллар. Бу үлэ таас матырыйааллартан оҥоһуллара тутуу үйэлээх буоларын мэктиэлиир. Күүтүүлээх тутуу олоххо киириитэ улуус салалтата, эппиэттээх тэрилтэлэр салайааччылара, дьокутааттар сыралаах үлэлэрин түмүгүнэн ситиһилиннэ.
Эрдэ биллэриллибит аукциоҥҥа ким даҕаны биллибэтэҕиттэн, биһиги быйыл тутуубут саҕаланыа суох дии сырыттахпытына, Томтор нэһилиэгиттэн урбаанньыт Иван Заболоцкай үлэлииргэ бэлэмин туһунан иһитиннэрбитэ. Иван Анатольевич сатабыллаах салайааччы буоларын көрдөрдө, билигин нэһилиэккэ үлэ күөстүү оргуйар. Киниэхэ сүрүн көмөлөһөөччүнэн Нам улууһун Нам сэлиэнньэтиттэн сылдьар инженер-тутааччы Егор Константинов буолар. Тиэхиньикэнэн уонна араас тэрилинэн тутааччыларга “Теплоэнегосервис” тэрилтэ Сордоҥноох учаастагын маастара Николай Прудецкай көмөлөһөр.
Тутааччылар бары олохтоох дьон. Ыстаарсайдара Никифор Гермогенов, Дьулус Прудецкай, Андрей Канаев уонна Павел Павлов туох баар сыраларын ууран туран тутууну болдьоҕор түмүктээри дьаныһан үлэлииллэр-хамсыыллар.
Дьиэ акылаатын Томтор нэһилиэгиттэн Сергей Попов, Константин Заболоцкай уонна Вячеслав Сергучев түһэрбиттэрэ.
Үлэһиттэр быйыл таас тутуу көҥдөйүн бүтэрэр былааннаахтар, онон эһиил куукуна уонна ыскылаат үлэҕэ киириэхтэрэ диэн эрэнэбит. Маны тэҥэ 2027 с. уһуйаан дьиэтин тупсаран оҥоруу былааннанар. Маннык эппиэтинэстээх хамаанда ылсыбыт соругун тиһэҕэр тиэрдэригэр саарбахтаабаппыт.
Түгэнинэн туһанан тутуу матырыйаалларын нэһилиэккэ тиэрдиигэ көмөлөспүт Дьокуускай куорат урбаанньытыгар Юрий Колодезниковка, олохтоох урбаанньыттар, кэргэннии Рустам уонна Мария Гарифулиннарга махталбытын биллэрэбит.
Тиэрдиллибит матырыйааллары сүөкүүргэ олохтоох дьон улахан күүс-көмө буоллулар, биир дойдулаахпыт Валерий Иванов онуоха тус тиэхиньикэтин уларсан абыраата.
“Норуот күүһэ – көмүөл күүһэ” диэн саха өһүн хоһооно этэринии, тыа сирин дьоно бары бииргэ түмсэн суолталаах дьыала олоххо киирэригэр тус кылаатын киллэрсэрэ кэрэхсэбиллээх.
Татьяна Сивцева, “Кэнчээри” уһуйаан сэбиэдиссэйэ, Сордоҥноох