Соторутааҕыта “2-с Бороҕон нэһилиэгэ” МТ дьаһалтатын баһылыгын Алексей Винокуров сыллааҕы үлэтин отчуоттуур мунньаҕа буолан ааста.
Алексей Николаевич 2024 с. туох үлэ-хамнас барбытын, үп-харчы ханна хамсаабытын, ситиһиилэр тустарынан мунньахха кэлбит дьоҥҥо сиһилии сырдатта, 2025 с. үлэ былаанын билиһиннэрдэ. Кини быйыл хаарбах дьиэттэн көһөрүү бырагыраамата салгыы үлэлиирин туһунан эттэ.
Нэһилиэк баһылыгын солбуйааччы Айаал Неустроев аныгы технологияны туһанан, мустубут дьоҥҥо тэрилтэлэр ааспыт сыллааҕы үлэлэрин-хамнастарын билиһиннэрэр презентацияны көрдөрдө.
Биһиги нэһилиэкпитигэр 2024 сылга саамай улахан ситиһии: Куйдуһун үрэҕи туоруур муоста тутуута; нэһилиэк Обручев аатынан уулуссатын тупсарыы үлэтэ саҕаланан, бастакы хардыы оҥоһулунна. Томтор нэһилиэнньэтэ сайыҥҥы кэмҥэ уунан хааччыллыбыта. Ардахтаах дьыл буолан, ханаабаны хаһыы курдук о.д.а. тустаах үлэ ыытыллыбыта.
Нэһилиэк баһылыгар А.Н. Винокуровка олохтоохтор үгүс кинилэри долгутар ыйытыктарын биэрдилэр. Онуоха баһылык Дьокуускай – Томтор – Дьокуускай хайысханан көтөр аал сылдьарын олохтуурга үлэ барыаҕа, Кыайыы 80 сылыгар анаан дьоһуннаах искибиэр тутуута ыытыллыаҕа, нэһилиэккэ олорор тыыл бэтэрээннэригэр, сэрии сылын оҕолоругар болҕомто ууруллуоҕа диэн хоруйдаата. Маны тэҥэ олохтоохтор Томторго участковай боломуочуйалаах үлэһит баар буоларын, тас көстүүнү тупсаран оҥорууга субсидия көрүллэрин туруорустулар.
Мунньахха кэлбит дьон баһылык сыллааҕы отчуотун астыммыттарын биллэрдилэр.
Надежда Литвинцева, биһиги общ. корр., Томтор