Бу дьыл кулун тутар 23-24 күннэригэр Томтор нэһилиэгэр Өймөкөөн улууһун үөрэх тэрилтэлэрин үлэһиттэрин сүбэ мунньаҕа үрдүк таһымнаахтык буолан ааста.
Суолталаах тэрээһин “Өймөкөөҥҥө аныгы үөрэхтээһин: саҥа ирдэбил – саҥа кыах” диэн тиэмэнэн ааста. Дьаһал РФ оскуола иннинэ үөрэтии, норуот сомоҕолоһуутун, улууска култуура уонна үтүө үгэстэр итиэннэ Өймөкөөн улууһугар үөрэх управлениетын төрүттэммитэ 90 сылларыгар ананна.
Икки күннээх тыҥааһыннаах үлэ түмүгэр улуус оскуолаларын учууталлара, уһуйааннар иитээччилэрэ, салайааччылар хас эмэ сиэксийэнэн арахсан суолталаах боппуруостары дьүүллэстилэр, практикумнар, семинардар, төгүрүк остуол, дьыалабыай оонньуулар, дискуссиялар буоллулар.
Томтор орто оскуолатын дириэктэри үөрэх чааһыгар солбуйааччы Антонина Егорова санаатын маннык үллэһиннэ:
— Бу күннэргэ улуус педагогтара Томторго мустан сүрдээх таһаарыылаахтык үлэлээтибит, олус туһалаах тэрээһин ааста. Биһиги, учууталлар, сүрүн сыалбыт-сорукпут диэн оҕо билиитин хаачыстыбатын үрдэтии буолар. Онон мин бэйэм модераторынан сылдьыбыт сиэксийэбэр математика, физика, информатика курдук туочунай наукаларга ордук улахан болҕомтону уурары тоһоҕолоон бэлиэтээтим. Кырдьык, үөрэнээччи алын сүһүөх кылаастан, холобур, төгүллээһин таблицатын биэс тарбаҕын курдук билэр буолан тахсыахтаах. Математика киһи өйүн-санаатын сааһылыыр, тобуллаҕас өйдөөх, сөпкө толкуйдуур кыахтаах буоларыгар олус туһалыыр. Уһуйааччылар бука бары үөрэтэр оҕолорбут кэнэҕэскитин олохторун суолун сөптөөхтүк тобулан, үөрэҕи баһылыылларыгар туохтааҕар даҕаны баҕарабыт. Онон бу кулун тутардааҕы сүбэ мунньахха манна туһуламмыт бэрт элбэх кэпсэтии, дьүүллэһии тахсыбыта кэрэхсэбиллээх.
Кэлэр өттүгэр сүбэ мунньах сиэксийэлэрин өссө кэҥэтэн, үөрэҕирии бары хайысхаларын дириҥник ырытар, үөрэтэр, үрдүк көрдөрүүнү ситиһэр туһугар бары кыһамньыбытын ууруох тустаахпыт.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина