Соторутааҕыта манна уопсастыбаннас мустан икки саҥа кинигэни ырыттыста, санаатын үллэһиннэ.
«Вы нашей памятью хранимы и всегда будете живыми» диэн кинигэ аатыттан да көстөрүнэн, анал байыаннай дьайыыга чугас дьонун сүтэрбиттэр сүрэхтэригэр иҥэн хаалбыт сылаас ахтылҕаннарын, өйдөбүнньүк туоһута буолар таһаарыы.
Бу кинигэни таһаарыыга бастакынан ХИФУ ыстаарсай преподавателэ Розалия Макарова ылсыбыта. Кини кэргэнэ байыаннай дьайыыга хантараагынан барбыта уонна 2023 с. күн сириттэн күрэммитэ. Розалия Петровна улуустардыын ыкса сибээстэһэн, араас боппуруостары туруорсан, элбэх дьону кытта бииргэ үлэлэспитин түмүгэ – бу кинигэ күн сирин көрүүтэ.
Өймөкөөн улууһуттан Томтор бибилэтиэкэтин исписэлииһэ, нэһилиэк дьокутаата Надежда Литвинцева сэттэ буойун дьонун кытта үлэлэспитэ. Бу эппиэтинэстээх, судургута суох соругу ылыммытыгар мустубут дьон Надежда Валерьевнаҕа махталларын тиэртилэр.
Иккис кинигэ — «Айыы санаа айана» — «Путь к добру» Олоҥхо ыһыаҕын туһунан альбом. Бу таһаарыы ааспыт сылга бэчээккэ тахсан, Дьокуускайга киэҥ далааһыннаахтык сүрэхтэниитэ ыытыллыбыта.
Өймөкөөн улууһугар буолбут Олоҥхо ыһыаҕын тэрээһинигэр улуус биир да олохтооҕо туора турбакка, баар кыаҕынан кыттыспыта, сүүрбүтэ-көппүтэ, өйүн-санаатын түмэн ылсыбыта.
Ол билигин бэртээхэй өйдөбүнньүк, үтүө санаа кыната, уос номоҕо буолан кэпсэнэ сырыттаҕа.
Бу туһунан сиһилии “Хотугу сардаҥа” хаһыакка ааҕыҥ.
Дария Тихомирова, биһиги общ. корр., Томтор