Төрүт нэһилиэгин орто оскуолатын иһинэн быйыл бэс ыйын 3 күнүттэн 21 хонуктаах оҕо доруобуйатын тупсарар хайысхалаах «Орлёнок» диэн сайыҥҥы сынньалаҥ лааҕыра үлэтин саҕалаата.
Лааҕыр салайааччыта Галина Олесова, иитээччи-педагог Варвара Дьяконова оҕолорго туһалаах, көдьүүстээх сынньалаҥы тэрийэргэ кыһаллыахтара. Кинилэргэ күүс-көмө буолуохтара асчыт Надежда Беляева уонна техническэй үлэһит Антонина Слепцова. Иитээччи-педагог Варвара Дьяконова кэпсииринэн, оҕолор сарсыарда аайы сэрээккэлээн, түөртэ тото-хана аһаан, былааннаммыт тэрийиилэргэ үөрэ-көтө кыттан, күннэрэ биллибэккэ ааһар. «День Пушкина», «Ночь в школе» диэн ааттаах хатыламмат түгэннэр буоллулар. Билигин Арассыыйа күнүгэр, нэһилиэк ыһыаҕар бэлэмнэнии үлэтэ бара турар. Ити курдук оҕолор сайын устата күнтэн күн аайы саҥаны арыйан, төрөөбүт айылҕаларыгар дуоһуйа сынньанан, сүүрэн-көтөн, оонньоон-көрүлээн бириэмэлэрин туһалаахтык атаарыахтара турдаҕа.
Ону таһынан оскуолабыт иһинэн «Зеленый патруль» үлэ лааҕыра үлэтин саҕалаата. Онно начаалынньык — Екатерина Кривошапкина, оттон асчыт Оксана Макарова буолаллар. Бу лааҕыр уолаттарын оскуола дириэктэрэ Гаврил Павлуцкай «Зеленка» диэн учаастакка элбэх сыллаах от күрүөтүн тутуутугар үлэлэтиэҕэ. Агро-хайысхалаах оскуола статуһун ыларга үөрэхпит тэрилтэтэ үлэлэспитэ икки сыл буолла. Теплицаҕа араас үүнээйини уонна стеллажка моркуоп, сүбүөкүлэ, хоруудаҕа хортуоска үүннэрэргэ уопут баар.
2022 сыллахха саҥа сиргэ хортуоппуй учаастагын хорутан, иэнэ билигин кэҥээн турар. Үүнээйини үүннэрии уонна сылгыны иитии хайысханы тутуһан, быйыл «Зеленкаҕа» сир хорутуллан, ол күрүөлэнэр.
Ону таһынан биһиги оскуолабытыгар иккис сылын кууруссаны иитиигэ ылсан үлэлииллэр.
Үлэ лааҕырын оҕолоро самаан сайыҥҥа сөтүөлээн, сибиэһэй салгыҥҥа үлэлээн-хамсаан, күүс эбинэн, аны күһүн оскуолаҕа улаатан, ситэн-хатан кэлэн, саҥа саҕахтары арыйан, өссө биир кэрдиис үөһээ тахсыахтара диэн эрэнэбит.
Елена ЧЕРЕМКИНА, учуутал, биһиги общ. корр.,
Төрүт