Олохтоох көҕүлээһини өйөөһүн бырагыраамата (ППМИ) таһаарыылахтык үлэлээбитэ хаһыс да сылыгар барда.
Бу бырагыраама чэрчитинэн Өймөкөөн улууһун нэһилиэнньэлээх пууннарыгар тас көстүүнү тупсарыы үлэтэ көхтөөхтүк ыытыллар, нэһилиэктэр тас көстүүлэрэ тупсан иһэллэрэ харахха быраҕыллар.
Саҥа үүммүт сылга “Төрүт нэһилиэгэ” тыа сирин поселениетын баһылыга Алексей Кондаков иһитиннэрбитинэн, террортан сэрэхтээх буолуу ирдэбилинэн уһуйаан дьиэтин олбуорун саҥардан тутуу оҥоһуллуохтаах. Соторутааҕыта бу үлэни үбүлүүр сыалтан сэлиэнньэ дьаһалтата өрөспүүбүлүкэтээҕи олохтоох көҕүлээһини өйөөһүн бырагырааматыгар ситиһиилээхтик кытынна.
Оттон Сордоҥноох нэһилиэгин баһылыга Альберт Вензель иһитиннэрбитинэн, кинилэргэ ППМИ бырагырааматынан 2026 сылга култуурнай-административнай кииҥҥэ аныгы LED-экраны ылыы уонна ыһыахтыыр сири саҥардыы үлэтэ күүтүллэр.
Томтор нэһилиэгин баһылыгын солбуйааччы Айаал Неустроев биэрбит чахчытынан, ааспыт сылга “Дьиэ уонна куорат эйгэтэ” национальнай бырайыак чэрчитинэн Томтор нэһилиэгэ “Табыгастаах куорат эйгэтин оҥоруу” федеральнай бырайыак кыттыылааҕынан буолбута. Ол түмүгэр нэһилиэккэ С. Обручев бульварын тупсаран оҥорбуттара.
— Мэҥэ Хаҥалас улууһуттан бэдэрээччит — “Биэрэк-Үрдэ” хааччахтаммыт эппиэтинэстээх тэрилтэ Обручев уулуссатыгар сатыы дьон сылдьар уонна спортивнай зоналары, олохтоохтор сынньаналларыгар табыгастаах миэстэни оҥорбута. Кэнэҕэскитин сатыы дьон зонатыгар хачыаллар, тренажердар тураллара былааннанар. Тупсаҕайдык оҥоһуллубут зонаны дьон-сэргэ олус сөбүлээтэ, “Сүрүн болуоссат” диэн ааттаата. Манна Улуу Кыайыыга, Оҕо көмүскэлигэр, Саҥа дьылы көрсүүгэ аналлаах тэрээһиннэр үрдүк таһымнаахтык ааспыттара, — диэн кэпсээтэ баһылык солбуйааччыта Айаал Неустроев.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина