Төрөөбүт тыл киһиэхэ өйүгэр-санаатыгар, майгытыгар-сигилитигэр дьайар күүһэ улахан. Хас биирдии киһи ийэ куттаах, ол иһин ийэ тыллаах.
Саха тылын билиҥҥи туругун уонна инники сайдыытын туһунан улуус ыччата санаатын маннык үллэһиннэ.
Елена Столярчик, улуус баһылыгын көмөлөһөөччүтэ, Уус-Ньара:
— Үгүс дьон сахалыы ыраастык саҥарара суоҕун кэриэтэ, элбэх кыбытык тылы туттуллар. Аныгы үйэҕэ сорохтор саха тылын суолтатын намтаталлара хомолтолоох.
Ол эрээри кэлиҥҥи кэмҥэ саха тылыгар интэриэс күүһүрэ турара үөрдэр. Саха тылын чөл хаалларарга, сайыннарарга үгүс үлэ барар. Оскуолаҕа, уһуйааҥҥа төрөөбүт тылы үөрэтиигэ улахан болҕомто ууруллар. Ыччат төрөөбүт тылын үөрэтэргэ дьулуһара кэрэхсэтэр. Куйаар ситимигэр сахалыы контент эмиэ элбиир.
Бары бииргэ кыһаллан ийэ тылбытын харыстаатахпытына сайыннардахпытына, кэлэр көлүөнэҕэ хаалларыахпыт турдаҕа.
Ринат Громов, улуустааҕы дьаһалта Ыксаллаах быһыыга-майгыга салаатын кылаабынай исписэлииһэ:
— Былыр-былыргыттан саха омук бүөбэйдээн, чочуйан-тупсаран кэлбит барҕа баайа — ийэ тыла буолар. Төрөөбүт тыл киһи үөрэҕи-билиини кэбэҕэстик ылынар, өйө-санаата туругурар, майгыта-сигилитэ ситэр, иһирэх иэйиитэ уһуктар, өлбөт үйэлээҕи айар-тутар дьоҕура тобуллар айылҕаттан бэриллибит эйгэтинэн буолар. Төрөөбүт тыл хас биирдии саха киһитин дууһатыгар, ис дьиҥэр уйаланан сытар. Оҕо сахалыы саҥарара дьиэ кэргэнтэн саҕаланыахтаах. Ол кэми төрөппүттэр куоттаран кэбиспэккэ, оҕобут инники дьылҕатын туһунан дириҥник толкуйдуохтаахпыт.
Алексей Заболоцкай, уһуйаан үлэһитэ, Үчүгэй:
— Төрөөбүт тылын билэр, өбүгэ үгэһин ытыктыыр киһи – инникитэ киэҥ, сайдыыга дьулуһуута баһаам. “Тыла суох – омук суох” диэн былыргы муударай дьон мээнэҕэ эппэтэх буолуохтаахтар. Биһиги нэһилиэкпитигэр түөлбэлээн олорор араас омуктар бэрэстэбиитэллэрэ өбүгэ саҕаттан кэлбит ийэ тылларын сир сирэйиттэн симэлийбэт мэктиэ быһыытынан сыаналыыллар.
Мантан утум салҕанар, омук дьылҕата үйэлэргэ сүппэт, симэлийбэт кэскиллэнэр.
Биһиги корр.