«Биир ньыгыл Россия» политическай партия регионнааҕы «Түмүк баар!» форума муус устар 13 күнүгэр Дьокуускай куоракка ыытыллыаҕа.
Киэҥ далааһыннаах дьаһал Д.К. Сивцев-Суорун Омоллоон аатынан Опера уонна балет судаарыстыбаннай театрыгар буолуоҕа. Онно олохтоох салайыныы уорганнарын, бизнес бэрэстэбиитэллэрэ, дьокутааттар, анал дьайыы кытыылаахтара, общественнай тэрилтэлэр актыбыыстара кыттыахтара.
Форум кыттыылаахтара сарсыардаттан киин куорат эбийиэктэринэн партия народнай бырагырааматын чэрчитинэн тутуллубут эбийиэктэринэн сылдьыахтара.
Форум кэмигэр кинилэр араас былаһааккаларынан арахсан партия көмөтүнэн, өйөбүлүнэн бары хайысхалары хабан Саха сиригэр ыытыллыбыт үлэлэри ырытыһыахтара, Норуот бырагырааматын олоххо киллэрии түмүктэринэн тирээн турар боппуруостарынан кэпсэтиигэ кыттыһыахтара — социальнай эйгэттэн саҕалаан креативнай экономикаҕа, ыччаты патриотическай иитиигэ, СВО байыастарын уонна кинилэр дьиэ кэргэттэрин өйөөһүҥҥэ тиийэ. Итини сэргэ актыбыыстар үлэлэрин бастыҥ уопутун атастаһыахтара.
Форум үөрүүлээх аһыллыытыгар Ил Дархан Айсен Николаев, «Биир ньыгыл Россия» партия Саха сиринээҕи салаатын региональнай ситэриилээх кэмитиэтин салайааччыта Надежда Селютина кыттан, кэллиэгэлэригэр эҕэрдэлэрин тиэрдиэхтэрэ.
Өймөкөөн оройуонуттан бу киэҥ хабааннаах тэрээһиҥҥэ үс делегат кыттыыны ылыаҕа – улуус баһылыга Александр Оконешников уонна Уус-Ньара уонна Аартык бөһүөлэктэрин баһылыктара Виктория Понамарчук, Василий Галуза.
Санатар буоллахха, «Биир ньыгыл Арассыыйа» партия 2021 сыллаахтан дойду олохтоохторун туруорсууларын өйөөн, этиилэриттэн турар анал норуот бырагырааматын олоххо киллэрэн үлэлэттэ. Аны билигин кинилэр иннилэригэр норуот санаатын истэн, түмэн партия кэлэр биэс сылга үлэтин-хамнаһын торумун тобулар, былаанын оҥостор сорук турар.
Бу ылыныллар бырагыраамаҕа ханнык этиилэр, соруктар, туруорсуулар киирэллэрэ тоҕоостооҕун «Түмүк баар!» форум кыттыылаахтара куолаан быһаарсыахтара.
Манна даҕатан эттэххэ, партия салалтата иһитиннэрбитинэн, билигин «Есть результат» диэн сайт аһыллан үлэлиир. Онно ким баҕарар киирэн биэс сыллааҕы үлэ түмүктэрин билсиһэр кыахтааҕын таһынан, дьон бэйэлэрин этиилэрин, толкуйдарын суруйуохтарын сөп.
Ирина Петрова