Сордоҥноох нэһилиэгин биир актыыбынай олохтооҕо, 26 сыл ыстаастаах үрдүк категориялаах иитээччи Августина Винокурова “Кэнчээри” уһуйааныгар таһаарыылаахтык үлэлии-хамсыы сылдьар.
Августина Власьевна Орто-Балаҕан нэһилиэгин төрүт олохтооҕо, үрдүк үөрэхтээх исписэлиис. Кэргэнинээн Владимирдыын ыал буолан алаһа дьиэ тэриммиттэрэ үйэ чиэппэригэр чугаһаата. Түөрт кыыс оҕоҕо күн сирин көрдөрбүттэрэ.
- Биһиги ыал буолуохпутуттан ынах сүөһү ииттэбит, онон кыргыттарбыт кыра саастарыттан үлэҕэ үөрүйэх буола улааппыттара. Биһигини кытта бииргэ оттоһон, тэбис-тэҥҥэ сүөһү көрсөллөр, ыарахан үлэни барытын сатыыллар: мас мастыыры, от охсору, массыына ыытары, бултууру даҕаны. Онон уол оҕото суох да буолларбыт, кыргыттарбыт улахан көмө дьоно буолаллара биһигини үөрдэр, — диэн кэпсиир ыал ийэтэ.
— Мин тус көрүүбүнэн оҕо оскуолаҕа киирэригэр хайаан да чуолкайдык саҥарар, дорҕоону истэн араарар, сүһүөх, тыл, этии өйдөбүллэрин билэр буолуохтаах. Оччоҕуна кини оскуолаҕа бэлэм диэн буолар. Иитээччи хас биирдии оҕо ордук туохха дьоҕурдааҕын чорботон, үлэтин онтон сиэттэрэн аттарар. Оҕо хайаан даҕаны оскуолаҕа ааҕар буолан киириэхтээх диэн бириинсиби тутустахха, кини ааҕыы сатабылын бастакы кэрчигин — дорҕоону билиитин көтүтэн, инникитин үөрэҕэр ыарырҕатыан сөп. Ол иһин иитээччиттэн кырачаан киһи оскуолаҕа киирэн хайдах үөрэнэриттэн улахан тутулуктаах, — диир уопуттаах иитээччи.
«Быыбар» диэн ааттаах ньирэйбинээн
Оҕо сайдыыта, уопсастыбаҕа киириитэ, тулалыыр эйгэни кытта алтыһыыта уһуйаантан саҕаланар. Кини бэйэтин саастыылаахтарын, улахан дьону кытта алтыһа, кэпсэтэ үөрэниэхтээх. Онуоха иитээччи уонна төрөппүт оруола улахан. Ол иһин биһиги кыракый иитиллээччи бары өттүнэн сайдыылаах, билиэн-көрүөн баҕалаах буоларын туһугар оскуоланы, төрөппүтү кытта ыкса ситимнээхтик үлэлиир соруктаахпыт, — диэн санаатын үллэстэр Августина Власьевна.
Августина Винокурова түгэнинэн туһанан, билигин Дьокуускайга олорор педагогическай үлэ бэтэрээнин Людмила Дмитриевна Егорованы 85 сааһын туолар үөрүүлээх үбүлүөйүнэн уонна идэлээх бырааһынньыгынан истиҥник-иһирэхтик эҕэрдэлээтэ. Л.Д. Егорова — Сордоҥноох нэһилиэгин хас да көлүөнэ ыччатын иитэн таһаарбыт ытык киһи, идэҕэ бэриниилээх буолуу биир чаҕылхай холобура.
Евдокия Егорова