Социальнай хантараак бырагырааматынан Саха сирин олохтоохторо судаарыстыбаттан тус дьыала арынарга 500 тыһ. солк. диэри кээмэйдээх үбүлээһини ылар кыахтаахтар.
Ил Дархан Айсен Николаев «Быһа эпииригэр» тус дьыала арыныан баҕалаах дьоҥҥо өйөбүлү оҥорор социальнай хантараак бырагыраамата быйыл салҕанарын туһунан эппитэ. Бэлиэтээн эттэххэ, судаарыстыба биэрэр 500 тыһ. солк. диэри кээмэйдээх субсидиятынан тиэхиньикэ, тус дьыаланан дьарыктанан саҕалыырга наадалаах матырыйаал атыылаһыахха сөп. Социальнай хантараагынан урбаанынан дьарыктаныан баҕалаах үлэлээбэт биэнсийэлээхтэр эмиэ туһанар кыахтаахтар, өскөтүн тус дохуоттара муҥутаан тиийинэн олоруу сууматын 1,5 төгүл аһарбат түгэнигэр, ол эбэтэр киин улуустарга бу суума 34 301 солк. тэҥнэһэр, хоту улуустарга – 40 952 солк.
Биэнсийэлээхтэр 12 ыйга болдьохтоох социальнай хантараак түһэрсэн, тус дьыала арыныахтарын, кэтэх хаһаайыстыба тэриниэхтэрин сөп, диэн иһитиннэрэр Ил Дархан уонна Бырабыыталыстыба пресс-сулууспата.
Эрэдээксийэ