Сэрии — киһи-аймах олоҕун айгыратар, сири-дойдуну алдьатар саамай улахан алдьархай.
Аҕа дойду Улуу сэриитин кэмэ уонна анал байыаннай дьайыы элбэх киһи олоҕун алдьатта, кэскилин быста, оҕону-ийэни ытатта, тулаайах хаалларда…
АҔА дойду Улуу сэриитигэр ыҥырыллыбыттартан элбэх киһи сэрии толоонугар охтубута, сураҕа суох сүппүтэ.
Сэрии хонуутугар охтубуттар ортолоругар мин таайым (эбэбинэн аймаҕым) Фёдоров Михаил Степанович эмиэ баар. Таайбын 1942 сыл от ыйыгар ходуһаҕа от охсо сырыттаҕына сэриигэ ыҥырыы бэбиэскэтин аҕалан туттарбыттар. Сэриигэ барааччылар дойдуларыттан оройуон киинигэр атынан, онтон салҕыы борохуотунан айаннара саҕаламмыт. Ити курдук эдэркээн 19 саастаах аҕыйах кылаас үөрэхтээх тыа сирин уола уоттаах сэриигэ айана саҕаламмыта.
Сэриигэ кини 1-кы Белорусскай уонна 3-с Украинскай фроннарга, К.К. Рокоссовскай хамаандатыгар сылдьыбыт, 321-с стрелковай полкаҕа миномётчик эбит.
Ити курдук икки аҥаар сылтан ордук уоттаах сэриини ортотунан ааспыт, Белоруссияны уонна Украинаны босхолоспут.
Таайым Михаил Степанович Федоров хорсуннук сэриилэһэ сылдьан, Польшаҕа Бурляки дэриэбинэ таһыгар 1944 сыл ахсынньы 3 күнүгэр сырдык тыына быстыбыта. Кини көмүс уҥуоҕа Пултуск куорат воеводствотын кылабыыһатыгар харалла сытар.
Көмүс уҥуоҕар быраата Николай төрөөбүт алааһыттан буор уонна сардаана сибэкки илдьэн олордубут этэ. Быраатыгар сахалыы саҥаран кэлбитин туһунан биһиги кини суруйан хаалларбыт ахтыыларыттан эрэ ааҕан билэбит…
УҺУН эйэлээх олох кэнниттэн сэрии ыар тыына, содула билигин да баар. Аныгы кэмҥэ Арассыыйа салалтата Ийэ дойдубут интэриэһин, дьон-норуот куттал суох буолуутун көмүскээн, түөрт сыл анараа өттүгэр анал байыаннай дьайыыны биллэрбитэ.
Манна Саха сириттэн элбэх ыччат, хорсун-хоодуот уолаттарбыт, убайдарбыт, аҕаларбыт дойдуларын иннигэр ытык иэстэрин толоро сылдьаллар. Кинилэртэн сорохторо сэрии толоонугар геройдуу охтубуттара.
МИН аҕам Аринкин Валерий Васильевич – СВО кыттыылааҕа этэ. Кини «Эр санааланыы» уордьанынан уонна «Хорсунун иһин» мэтээлинэн үс төгүл наҕараадаламмыта. “Амина” диэн позывнойдаах этэ. Анал байыаннай дьайыыга сулууспалыы сылдьан, ДНР Красноармейскай оройуонун Елизаветовка бөһүөлэгэр сырдык тыына быстыбыта. Көмүс уҥуоҕа Мэҥэ Хаҥалас Петровка нэһилиэгэр көмүллүбүтэ.
Аҕам сырдык аатын үйэтитэргэ дойдутун дьоно элбэх үлэни ыыттылар. Ол курдук Василий Оконешников аатынан үөрэммит Нөөрүктээйи орто оскуолатыгар аҕам сырдык аатыгар “Дьоруой паартатын” анаабыттара уонна биир бастыҥ үөрэнээччигэ стипендия туттарбыттара.
Бу тэрээһиҥҥэ аҕам табаарыһа, Арассыыйа Дьоруойа Андрей Григорьев-Тута кэлэн кыттыыны ылбыта. Кини аҕам туһунан маннык ахтыбыта: “Валерийы кытта Южно-Сахалинскайтан ыла бииргэ этибит. Элбэх бойобуой сорудахха сылдьыбыппыт. Ханнык да түгэҥҥэ кини киһи эрэнэр киһитэ этэ».
БУ эйэлээх олох иһин уонна кэлэр көлүөнэ куттала суох олоҕун туһугар анал байыаннай дьайыыга сылдьар уолаттарбыт, эйэлээх олох түргэнник эргиллэн, этэҥҥэ дойдуларыгар, дьонноругар кэлэллэригэр мин ис сүрэхпиттэн баҕарабын.
Кыайыыны уһансыбыт, эйэни турууласпыт чулуу дьоммутун хаһан да умнумуоҕуҥ, кинилэр ааттарын ааттата туруоҕуҥ!
Миша АТЛАСОВ,
Г.А. Кривошапкин аатынан
Төрүт орто оскуолатын
10-с кылааһын үөрэнээччитэ
Хаартыскаларга:
- Таайым Фёдоров Михаил Степанович (1923-1944 сс.).
- Аҕам Аринкин Валерий Васильевич (1982-2025 сс.).
Ыстатыйаны сиһилии “Хотугу сардаҥа” хаһыакка ааҕаарыҥ