Оҕону кыра сааһыттан патриотическай өйгө-санааҕа, тыыҥҥа иитии улууспут уһуйааннарын үлэтин биир сүрүн хайысхатынан буолар. Улуу Кыайыы 80 сылын көрсө нэһилиэктэр уһуйааннарыгар патриотическай хабааннаах араас дьаһаллары тэрийэн ыыталлар.
Ол курдук соторутааҕыта Биэрэк-Үрдүн «Чуораанчык» уһуйааныгар Аҕа дойдуну көмүскээччи күнүн чэрчитинэн нэдиэлэ устата олус интэриэһинэй, көхтөөх тэрээһиннэр буоллулар. Улууска Патриот сылын иитинэн иитээччилэр бэйэлэрэ бэлэмнээбит байыаннай тиэхинньикэ, араас идэлэр тустарынан истиэндэлэри көрдөрөн оҕолорго кэпсээтилэр, сэргэхситтилэр. Ону тэҥэ кинилэргэ байыаннай ырыа-үҥкүү, хоһоон бэлэмнээн үөрэттилэр, араас байыаннай оонньуулары тэрийдилэр.
— Кырачааннар аҕаларын, убайдарын эҕэрдэлээн бэйэлэрэ илиилэринэн оҥорбут аккырыыккаларын бэлэх ууннулар. Тэрээһиҥҥэ кырачааннар үөрэ-көтө кыттан элбэҕи биллилэр-көрдүлэр, – диэн уһуйаан иитээччитэ Марта Смирнова кэпсээтэ.
Оттон Үчүгэй нэһилиэгин «Тугутчаан» уһуйаанын иитиллээччилэрэ орто уонна улахан бөлөххө арахсан, стройунан хаамтылар. Хамандыыр Харысхан Винокуров доргуччу рапорт этэн, этэрээтин салайда. Кырачааннар хоһоон ааҕан ньиргиттилэр. Начаалынай байыаннай бэлэмнэнии (НВП) учуутала Лингвард Карпов оҕолорго автомат ыһыытын-хомуйуутун көрдөрдө.
- Кырачааннар ону барытын олус сэҥээрэн көрдүлэр, уолаттарбыт автомат сааны тутар дьоллоннулар, — диэн үллэһиннэ иитээччи Сардаана Громова.
Төрүт нэһилиэгин уһуйааныгар кэрэ-бэлиэ күҥҥэ параады көрүү тэрээһинэ буолла.
Кырачааннар буойун саллаат курдук сананан, маршировкалаан киирдилэр. Этэрээт хамандыыра Айар-Хаан Дьяконов Өрөгөй ырыатынан доҕуһуолланан дойдубут былааҕын тутан рапорт биэрдэ.
- Оҕолорбут ырыа ыллаан дьиэрэттилэр, хоһоон этэн доргуттулар, – диэн сэһэргээтэ иитээччи Наталья Каландарова.
Бу тэрээһиҥҥэ аармыйаттан саҥа кэлбит саллаат Арсений Атласов мааны ыалдьыт буолла уонна эҕэрдэтин кылгастык маннык тиэртэ:
- Биир дойдулаахтарбар, инникитин Аҕа дойдуну көмүскүүр аналлаах кырачаан патриоттарбытыгар хорсун буолууну, Ийэ дойдуга муҥура суох тапталы уонна бэриниилээх буолууну баҕарабын.
Евдокия Егорова