Бу күннэргэ Москва куоракка «Төрүт дойду – Арассыыйа күүһэ» диэн бүтүн Арассыыйатааҕы пуорум түмүктэннэ.
Суолталаах тэрээһиҥҥэ Саха сириттэн кыттыбыт 160 оройуон уонна нэһилиэк баһылыктарын кытары Тымныы полюһуттан Өймөкөөн улууһуттан улуус баһылыгын э.т. Иван Максимов, Томтор нэһилиэгин баһылыга Алексей Винокуров, Өймөкөөн нэһилиэгин баһылыга Павел Васильев бааллар.
– Пуорум үс сүрүн хайысханан ааста «Сүрүн күүс – дьон», «Сайдыы күүһэ» уонна «Үгэс күүһэ». Биһиги бүтүн Арассыыйатааҕы пуорум чэрчитинэн ВДНХ араас былаһааккаларынан ыытыллыбыт мунньахтарга, «төгүрүк остуолларга», санаа атастаһыыларын былаһааккаларыгар сырыттыбыт. Дойду Аҕа баһылыга Владимир Путин ыйаахтарын уонна национальнай бырайыактары миэстэтигэр олоххо киллэрэ сылдьар дьон быһыытынан эрэгийиэннэр ситиһиилэрин туһунан быыстапкалары сиһилии көрдүбүт, үөрэттибит, уопут атастастыбыт. Live Arena диэн былаһааккаҕа дойду Бэрэсидьиэнэ Владимир Путины кытары көрүстүбүт. Пуорумҥа сылдьан көрбүт, санаа атастаспыт билиибит, биллэн турар, улууспут социальнай-экэнэмиичэскэй олоҕун тупсарарга, сонун сүүрээннэри толкуйдуурга, тобуларга сыл саҥатыттан саҕалаан үлэлииргэ олус туһалаах тэрээһин буолла, — диэн санаатын үллэһиннэ улуус баһылыгын э.т. Иван Максимов.
Маны таһынан, улуус дэлэгээссийэтэ РФ Федеральнай мунньаҕын Сэбиэтин сэнээтэрэ Сахамин Афанасьевы, Өймөкөөн улууһугар көмүс хостуур тэрилтэлэр салайааччыларын кытта көрсөн, оройуон социальнай-экэнэмиичэскэй сайдыытыгар сыһыаннаах боппуруостары ырытыста.
«Былырыын Өймөкөөн улууһа Олоҥхо Ыһыаҕын ыыппыт буолан, үгэс быһыытынан быйыл Коломенскай пааркатыгар ыһыах тэрийиэхтээх. Онон сибээстээн Арассыыйа Федерациятын Президенигэр Саха Өрөспүүбүлүкэтин сис бэрэстэбиитэлистибэтин (постпредствотын) уонна Москва куорат Коломенскай оройуонун дьаһалтатын кытта тэрээһин боппуруостары дьүүллэстибит», — диэн бэлиэтээтэ улуус баһылыгын э.т. Иван Максимов.
Улуустааҕы пресс-сулууспа
Хаартыска: Баһылыктар Москваҕа.
Иван Максимов тиксэриитэ.