Куйдуһун муостата: быстах кэмҥэ айан суола аһылынна

Куйдуһун саҥа муостатын бэс ыйын 15 күнүгэр анал хамыыһыйа тутуоҕа

Былырыын күһүн Өймөкөөн улууһугар Олоҥхо Ыһыаҕын кэнниттэн хас да хонуктаах дохсун ардах түһэн, Куйдуһун муостатын сууйан кэбиспитэ.

1979 сыллаахха тутуллубут 298 м мас муоста саахалланар туруктаах буолан, тирэхтэрэ уонна арыттара уларытыллан оҥоһуллар соруга турбута. Онно эбии анал былаанынан «2014 сыллаахха саҥардыллан тутуллубут муоста систэрин бастакы арыта (пролет) оннунан хаалыаҕа, атыттара уларытыллыахтара» диэн быһаарыы ылыллыбыта.

Ситэриилээх былаас отчуотун кэмигэр Өймөкөөн улууһун олохтоохторун кытта көрсүһүүгэ оробуочай бөлөҕү салайар СӨ тырааныспарка уонна суол хаһаайыстыбатыгар миниистир Владимир Сивцев аара Куйдуһун муостатыгар анаан тохтоон, туох үлэ ыытыллан эрэрин билсибитин билиһиннэрбитэ уонна олунньу 26 күнүттэн суолталаах үлэ саҕаланарын туһунан иһитиннэрбитэ. Лоп курдук этиллибит кэмҥэ үлэ күөстүү оргуйан барбыта…

Дьэ, уонна бу күннэргэ үөрүүлээх сонун өрөспүүбүлүкэ бары иһитиннэрэр тиһиктэрин толордо — Өймөкөөн улууһугар тутулла турар Куйдуһун муостатын тутар бэдэрээтчит «СтройМост» ХЭУо ыам ыйын 14 күнүттэн сүрүн тутууну түмүктээн, быстах кэмҥэ айан суолун аста.

«Ил Дархан Айсен Николаев сорудаҕынан 298 миэтэрэ уһуннаах муоста кылгас кэм иһигэр тутуллан бүттэ. Тутуу үлэтэ б.дь. олунньу ый бүтүүтүтэн саҕаламмыта. Бүгүҥҥүттэн ыла манна айан-сырыы олохтонно», — диэн СӨ айан суолун управлениетын генеральнай дириэктэрин солбуйааччы Виктор Игнатьев иһитиннэрдэ.

Томтор нэһилиэгин баһылыгын солбуйааччы Айаал Неустроев тутааччылары кытта анаан тиийэн көрүстэ.

— Билиҥҥи туругунан тутуу сүрүн үлэтэ бүппүт. Аны күргэ тутуһар сыҥаһата (перила) уонна сатыы дьон сылдьар суола (пешеходная дорожка) оҥоһуллуохтаах. Маны таһынан, биэрэги бөҕөргөтөр үлэ барыахтаах. Эргиир суолга турар САРМ муостаны көтүрэн, массыыналар аны Куйдуһун муостатынан сылдьыахтара. Муоста сыҥаһата оҥоһулла илик буолан, айан-сырыы сарсыарда 7 чаастан киэһэ 21 чааска эрэ диэри көҥүллэнэр. Хараҥарыыта айан-сырыы тохтуур. Бэдэрээтчит Куйдуһун саҥа муостатын үлэтин барытын бэс ыйын 15 күнүгэр түмүктээн, анал хамыыһыйаҕа туттарыаҕа, — диэн Айаал Неустроев иһитиннэрдэ.

… Куйдуһун муостата Сордоҥноох уонна Томтор олохтоохторун хайдах сыл аайы кэриэтэ эрэйдээбитин туһунан бу сыллар тухары суруйан аҕай биэрдим. Онон, туһугар, кинигэ да суруллуон сөп курдук буолла быһыылаах. Аны мантан инньэ Сордоҥноох уонна Томтор нэһилиэктэрин олохтоохторо кыһыннары-сайыннары сылдьар саҥа муосталанан, эрэйи кыһалҕаны көрбөт инилэр диэн бигэтик эрэнэр буоллахпыт.