Соторутааҕыта атыыһыт, меценат Н.О. Кривошапкин аатын сүгэр Дьокуускай куорат 5 №-дээх оскуолатыгар 9-с кылаас үөрэнээччилэригэр “Тымныы оройо – Өймөкөөн” диэн ааттаах кылаас чааһын тэрийэн ыыттыбыт.
Мин сүрүннээн, Өймөкөөн аар-саарга тымныы чыпчаала буолан, Сахабыт сириттэн, Арассыыйа араас муннуктарыттан, омук дойдуларыттан элбэх сыл устата туристары ыҥыра, угуйа турарын, ыалдьыттары хайдах көрсөрбүт туһунан сырдаттым.
Кэпсээним саҕаланыытыгар «Я расскажу вам об Оймяконе» диэн кинигэни туһанным. Кинигэ ааптара — Өймөкөөҥҥө аан бастаан туризм сайдарыгар туруулаһан үлэлэспит, улаханнык ытыктыыр киһибит, Саха сирин үөрэҕэриитин туйгуна Слепцов Спиридон Васильевич буолар.
Маны тэҥэ Өймөкөөнү аан дойдуга барытыгар билиһиннэрэ олорор киһибит, кыраайы үөрэтээччи, элбэх кинигэ ааптара Тамара Егоровна Васильева туһунан кылгастык билиһиннэрдим. Туристары кытта Өймөкөөн орто оскуолата, айар кэлэктииптэр ханнык хайысханы тутуһан үлэлииллэрин сырдаттым.
Тэрээһин иккис аҥарыгар бу оскуола попечительскай Сэбиэтин иккис бэрэссэдээтэлэ, меценат Кырбаһааҥкын сыдьаана Лариса Кривошапкина атыыһыт өрөспүүбүлүкэбитигэр үөрэҕирии сайдарын туһугар оҥорбут үтүөлэрин, кини тус олоҕун туһунан интэриэһинэй чахчылары кэпсээтэ. Лариса Юрьевна бу оскуолаҕа өр сылларга ис дууһатын, сыратын биэрэн туран попечительскай сүбэҕэ үлэлээбит хаан уруутун, Төрүт нэһилиэгиттэн төрүттээх Кривошапкин Александр Егорович туһунан эмиэ ахтан-санаан аһарда. Кини оҕолор бу сырдык, киэҥ-куоҥ оскуола дьиэтигэр үөрэнэллэригэр улахан кылаатын киллэрсибит киһинэн буолар.
Биир дойдулаахпыт, бука бары киэн туттар, сүгүрүйэр киһибит, меценат Н.О. Кривошапкин туһунан үтүө өйдөбүл өрүү баар буоларын туһугар маннык ис хоһоонноох тэрээһиннэр ыытыллаллара олус наадалаах дии саныыбын.
Тамара Винокурова, биһиги общ.корр., Дьокуускай