Бу күннэргэ улуус салалтата муниципальнай тэриллиилэргэ сылдьан, социальнай эбийиэктэри көрдө-иһиттэ, олохтоохтору кытта көрсөн, санааларын атастаста.
Нэһилиэнньэни кытта көрсүһүүлэргэ салалта муниципальнай тэриллиилэр социальнай-экэнэмиичэскэй сайдыыларын, ититии сезонун хаамыытын, социальнай эбийиэктэри тутууга уонна өрөмүөннээһиҥҥэ, уунан хааччыйыы боппуруостарыгар, суол ситимин сайыннарыыга туһаайыллыбыт суолталаах боппуруостары дьүүллэстэ.
Муниципалитет баһылыга Александр Оконешников оробуочай сырыы түмүгүнэн санаатын бу курдук үллэһиннэ:
— Муниципальнай тэриллиилэргэ сүрүннээн инфраструктураны сайыннарыы, уунан хааччыйыы систиэмэтин тупсарыы, территориялары тупсарыы уонна сырдатыы кыһалҕалара, олорор дьиэ-уот уонна пассажирдары тиэйиигэ сыһыаннаах боппуруостар, медицинскэй тэрилтэлэр үлэлэрин ырыттылар. Нэһилиэк иһинээҕи суоллары өрөмүөннээһин, саҥардыы уонна туругун оҥоруу нэһилиэк олохтоохторун долгутар өссө биир боппуруоһунан буолар. Манна дьон санаатын эмиэ хото эттэ.
Салалта оробуочай сырыытын сүрүн түмүгэ – былаас уонна нэһилиэнньэ икки ардыларыгар ыкса сибээс олохтонно. Бу бырайыагы салгыы сайыннарыахха, тохтотумуохха наада. Санаа атастаһан, кыһалҕалары, ону быһаарар суоллары тобулары ырыттыбыт, сүбэлэстибит. Былааска итэҕэйии таһыма быдан үрдээн иһэрэ харахха быраҕыллар. Ол, биллэн турар, билиҥҥи уустук кэмҥэ олус наадалаах.
Муниципальнай тэриллии баһылыгын 1-кы солбуйааччы Алексей Федотов үлэтин бастакы дьоһуннаах сырыытын туһунан санаатын маннык үллэһиннэ:
— Дьон-сэргэ туруорсуута болҕомтолоох сыһыаны ирдиир. Нэһилиэктэр олохтоохторо дойдуларын сайдыытыгар сыһыаннаах боппуруостары быһаарыыга, олохтоох кадрдары бэлэмнээһиҥҥэ, туризмы сайыннарыыга тус бэйэлэринэн кыттыыны ылаллара кэрэхсэбиллээх. Биллэн турар, үгүс боппуруос кэлимник уочаратынан быһаарыллыаҕа — “уһун болдьохтоохтор” да бааллар, ыксаллаах быһаарыыны эрэйэллэр да бааллар.
Сокуон быһыытынан, мунньахтарга көтөҕүллүбүт үгүс боппуруостары быһаарар боломуочуйа муниципальнай олохтоох салайыныы уорганнарын боломуочуйаларыгар киирэрин бэлиэтиир тоҕоостоох. Кинилэр үөскээбит балаһыанньаны үрдүттэн кэтээн көрө олороллор, кыһалҕалары быһаарарга кэмигэр миэрэлэри ылар эбээһинэстээхтэр. Маннык үлэ ордук тэрээһиннээхтик ыытыллар, былаас, нэһилиэнньэ, дьокутаат куорпуһун уонна урбаан субъектарын икки ардыларыгар сөбүлэһии, конструктивнай дьүөрэлэһии баар, ыытыллар муниципальнай тэриллиилэригэр бу боппуруостар түргэнник уонна көдьүүстээхтик быһаарыллаллара саарбаҕа суох.
… Биллэн турар, бу маннык көрсүһүүлэр уонна дьону кытта атах тэпсэн олорон кэпсэтии олохтоох былааһы уонна улуус олохтоохторун бэйэ-бэйэлэригэр чугаһатара, биир тыынныыра чахчы.
Өймөкөөн улууһун дьаһалтатын пресс-сулууспата