“Өймөкөөн улууһа” МО дьаһалтатын баһылыга Александр Оконешников ааспыт сыллааҕы үлэни-хамнаһы отчуоттуур оробуочай бөлөҕү кытта бу нэдиэлэҕэ улуус бары нэһилиэнньэлээх пууннарыгар сырытта.
Улууска бастакы отчуот 300-чэкэ нэһилиэнньэлээх Аартык бөһүөлэгэр ыытыллыбыта. Манна олохтоох нэһилиэнньэ баһылык сыллааҕы үлэтин отчуотун истэн баран, хаарбах дьиэттэн көһөрүүгэ, заправкалыыр ыстаансыйа, олох-дьаһах коммунальнай хаһаайыстыбатын кыһалҕаларыгар, миэстэтигэр туризмы сайыннарыы курдук о.д.а. суолталаах боппуруостары көтөхтө.
Александр Савельевич Уус-Ньараҕа отчуоттууругар доруобуйа харыстабыла, үөрэхтээһин, култуура уонна духуобунас, успуорт, ыччат бэлиитикэтин, тыа хаһаайыстыбатын, суол-иис, ойуур баһаардарыттан сэрэтэр үлэни ыытыы, халааннааһын, экология, анал байыаннай дьайыы, бырамыысалыннас боппуруостарын таарыйда. Маны тэҥэ кини үүммүт сылга былааннанар үлэ-хамнас, бырайыактар тустарынан сырдатта.
Салайааччыта бэлиэтээбитинэн, анал байыаннай дьайыынан сибээстээн оройуон бүддьүөтүн сорох чааһа сарбыллан турар. Онон уустук сыл биһигини күүттэр даҕаны, сотору Дьокуускайга командировкаҕа тиийэн, муниципальнай бырагыраамалары үбүлээһиҥҥэ эбии үп-харчы буларга күүскэ үлэлэһиэхпит, диэн бэлиэтээтэ баһылык.
Александр Оконешников улуус бүддьүөтүн хаҥатыыга оройуоҥҥа үлэлиир бырамыысалыннас тэрилтэлэрин кытта ыкса үлэлэһэр былааннаахтарын иһитиннэрдэ. Ол быһыытынан бу дьыл кулун турарыгар көмүсчүттэр кыттыылаах киэҥ хабааннаах сүбэ мунньах ыытылларын былаанныыры, онно көдьүүстээх кэпсэтии тахсарыгар эрэнэрин биллэрдэ. Билиҥҥитэ улууска 9 бырамыысалыннас тэрилтэтин кытта оройуон социальнай-экэнэмиичэскэй сайдыытыгар Сөбүлэһии оҥоһуллан турар.
Баһылык Өймөкөөн оройуонун олохтоохторо анал байыаннай дьайыыга сылдьар биир дойдулаахтарыгар кыахтара баарынан көмөлөһөллөрүн, кинилэри өйүүллэрин сыаналаан туран, дьонугар-сэргэтигэр барҕа махталын тиэртэ. Бу дьыл муус устарыгар улуус дэлэгээссийэтэ анал дьайыы зонатыгар көмөнү тиэрдэ өссө төгүл бара сылдьарын туһунан кини эттэ. Онон баҕалаах дьон бу патриоттуу аахсыйаҕа кыттыахтарын сөп.
Александр Оконешников улуус олохтоохторугар өссө төгүл махтанан туран, бары үтүөнү, бэйэ-бэйэни харыстаһан, ыалдьыбакка-сүппэккэ сылдьалларыгар баҕарда.
Любовь Кривошапкина