Улуу Кыайыы 80 сылын Өймөкөөн улууһун олохтоохторо сэрии уонна тыыл бэтэрээннэригэр анаммыт болуоссаттарга уонна искибиэрдэригэр бэлиэтиэхтэрэ. Бу туһунан улуус баһылыгын социальнай боппуруостарга солбуйааччы Прасковья Аммосова иһитиннэрдэ.
— Оройуоҥҥа билигин 12 тыыл бэтэрээнэ уонна 86 сэрии оҕото олорор. Улууска Ийэ дойдуларын иннигэр олохторун толук биэрбит Аҕа дойду Улуу сэриитин кыттыылаахтарыгар уонна тыылга кыайыыны уһансыбыт бэтэрээннэри чиэстээн «Өйдөбүнньүк чүмэчитин уматыы» аахсыйа буолуоҕа.
Быйыл бэс ыйын 14 күнүгэр Өймөкөөн нэһилиэгэр 80 сыл анараа өттүгэр буолбут Улуу Кыайыы ыһыаҕа ыытыллыаҕа. Улуус дьаһалтата уонна Муниципальнай сэбиэт дьокутааттарын быһаарыыларынан, улуус бүддьүөтүттэн тыыл бэтэрээннэригэр 20 тыһыынча солкуобай, сэрии оҕолоругар 5 тыһыынча солкуобай эбии өйөбүл көрүлүннэ. Өймөкөөнтөн төрүттээх Дьокуускай куоракка олорор тыыл бэтэрээннэригэр уонна сэрии оҕолоругар бырааһынньыктааҕы ас набора туттарыллыаҕа. Ыам ыйын 7 күнүгэр улуус баһылыга Александр Оконешников улуус киинигэр сэрии оҕолорун дьиэлэригэр сылдьан эҕэрдэлиэҕэ. Бары нэһилиэктэргэ бэтэрээннэрин чиэстиэхтэрэ, араас тэрээһиннэр буолуохтара.
Тыыл бэтэрээннэригэр, сэрии оҕолоругар эйэлээх халлааннаах олоҕу, кытаанах доруобуйаны, оҕолорун уонна сиэннэрин тапталларыгар угуттанан дьоллоохтук олороллоругар баҕарабыт, — диэн бэлиэтээтэ Прасковья Егоровна.
Өймөкөөн улууһун дьаһалтатын пресс-сулууспата