Биһиги улууспутугар “Өймөкөөн улууһа (оройуона)” МТ дьаһалтатын физическэй култуураҕа уонна успуорка салаатын исписэлииһэ Сергей Егоров бэлиэтээбитинэн, улууска былааннаах үлэ ыытыллар.
— Быйыл, бары билэргит курдук, биһиги улууспутугар 16-с “Айыы санаа айана. Аар айылҕа ытык эргиирэ” өрөспүүбүлүкэтээҕи Олоҥхо Ыһыаҕа үрдүк таһымнаахтык ыытылынна. Онтон ханнык баҕарар ыһыах спортивнай күрэхтэһиитэ суох ааспат. Онон, успуорт салаатын үлэһиттэригэр эмиэ ураты эппиэтинэстээх, тургутуулаах кэм буолбута, — диэн санаатын үллэстэр Сергей Егоров. — “Көмүс күрүө” маанылаах түһүлгэтигэр өрөспүүбүлүкэбит ааттаахтара-суоллаахтара кэлэн күүстэрин холоннулар, кыахтарын көрдөрдүлэр, успуорду сэҥээрээччилэргэ туспа бырааһынньыгы бэлэхтээтилэр.
— Сылбыт өссө биир улахан суолталаах тэрээһининэн киин куоракка “Триумф” успуорт уораҕайыгар РФ успуордун маастара, СӨ VI ыҥырыылаах Судаарыстыбаннай Мунньаҕын (Ил Түмэн) дьокутаата Александр Крылов кэриэһигэр көҥүл тустууга Бүтүн Арассыыйатааҕы иккис турнир ыытыллыбыта буолар. Онтон сотору Томторго үтүө үгэскэ кубулуйбут СӨ физическэй култуура уонна успуорт туйгуна Савелий Оконешников кэриэһигэр хапсаҕайга өрөспүүбүлүкэтээҕи турнир ыытыллыаҕа, — диэн сэһэргээтэ успуорт исписэлииһэ С. Егоров.
Сергей Олегович 2023 сыл түмүгүн таһаарарга, бастыҥнары чиэстииргэ үлэ барарын туһунан сырдатта. Ол курдук, улуус спортсменнара сыл устата араас таһымнаах күрэхтэһиилэргэ, сүүмэрдиир дьарыктарга тиһигин быспакка кытталлар.
Тириэньэрдэр иитиллээччилэрин кытта утумнаахтык дьарыктаналлар. Сылы түмүктүүр тэрээһиҥҥэ улуус аатын ааттатар, успуорду өрө тутар 10 спортсмены чиэстиэхтэрэ. Олор истэригэр успуорт бэтэрээннэрэ эмиэ киириэхтэрэ.
— 2024 сылга Саха сиригэр улахан суолталаах тэрээһин – “Азия оҕолоро” норуоттар икки ардыларынааҕы VIII спортивнай оонньуулар ыытыллыахтара. Манна Өймөкөөн улууһун спортсменнара улуустарын аатын ааттаталларын туһугар көдьүүстээх үлэ ыытыллар, өссө даҕаны салҕаныа турдаҕа, — диэн түмүктээтэ кэпсэтиибитин С.О. Егоров.
Любовь Кривошапкина