Томтор түөлбэтин ытыктанар олохтооҕо Винокуров Ананий Семенович (1927-2011 сс.) өр сылларга “Өймөкөөн” сопхуоска биригэдьииринэн уонна зоотехнигынан үтүө суобастаахтык үлэлээбитэ. Кэлиҥҥи сылларга кини Томтордооҕу почтаҕа начаалынньыктаабыта.
Ананий Семенович кэргэнинээн Евдокия Николаевналыын үс оҕоҕо күн сирин көрдөрбүттэрэ (Люба, Надя уонна Артем). Билигин үс сиэн уолаттар анал байыаннай дьайыы саҕаланыаҕыттан Ийэ дойдуларын чиэһин дьоһуннаахтык көмүскүү сылдьаллар.
Ол курдук Любовь Ананьевна уола Евгений Саввин (Скрыбыкин) анал байыаннай дьайыыга ыҥырыллан, Запорожскай уобаласка мотострелковай полкаҕа сулууспалыы сылдьар. Кини “Хорсунун иһин” уонна “За вклад в повышение статуса отца и укрепление института семьи” мэтээллэрдээх. Быйыл кулун тутарга Ил Дархан Айскен Николаев Евгенийга саха быһаҕын туттарбыта.
Артем Ананьевич уола, эһэтин аатынан сүрэхтэммит Ананий Винокуров 2023 сыллаахха анал байыаннай дьайыыга баҕа өттүнэн хантараак түһэрсэн барбыта, Севастополь куоракка морской пехотаҕа сулууспалыыр.
Оттон Надежда Ананьевна уола Алексей Охлопков анал байыаннай дьайыыга 2022 сыллаахха ыҥырыллыбыта. Билигин Князе-Волконскай бөһүөлэккэ танковой ротаҕа сулууспалыыр.
Саха ыччата олус эппиэтинэстээх, патриоттуу өйө-санаата баһыйар буолан төрөөбүт түөлбэтин, чугас дьонун-сэргэтин көмүскүүргэ өрүү бэлэмин бу биир дьиэ кэргэн холобуруттан даҕаны көрөбүт. Уолаттарбыт бары этэҥҥэ дойдуларыгар этэҥҥэ эргиллэн кэлэллэрин күүтэбит.
Сиһилии “Хотугу сардаҥа” хаһыакка ааҕыҥ.
Надежда Литвинцева, общ. корр., Томтор