Биһиги оскуолабытыгар саҥа үөрэх дьылыгар үөрүүлээх сонун тосхойбута. Бу сайын СӨ Ил Дархана Айсен Николаев Өймөкөөн оскуолатыгар саҥа оптуобус күлүүһүн туттарбыта. Маны улуустааҕы Үөрэх управлениетын начальнига Константин Тимофеев туруорсубута.
Алтынньы 14 күнүгэр биһиги оскуолабыт выпускнига Дьулустаан Винокуров учууталларга хортуоппуй, хаппыыста уонна оскуолаҕа миэбэл тиэйэн аҕалан барыбытын үөртэ. Киниэхэ улахан махталбытын тиэрдэбит.
Саҥа автобуспутунан айаннаан 1-кы гильдиялаах атыыһыт, меценат Ньукулай Кырбаһааҥкын олорбут уһаайбатыгар тиийбиппит. Түмэлгэ «Кривошапкинскай уруоктар» ыытыллыбыттара.
Икки күнү быһа олус бэртээхэй тэрээһин буолан ааста. Манна бастакы күн алын кылаас оҕолоро, иккис күн улахан кылаастар үөрэнээччилэрэ кытыннылар.
Атыыһыт, меценат Ньукулай Кырбааһаҥкын уһаайбата Өймөкөөн нэһилиэгиттэн 2 км тэйиччи сиргэ – Райотдел учаастагар баар.
Бу дьиэҕэ алгысчыт Николай Старков көмүлүөк оһоҕу тигинэччи оттон, биһигини сахалыы сиэри-туому тутуһан, алгыстаах алаадьынан көрсүбүтэ.
Онтон түмэл үлэһитэ Альбина Алексеева уонна дириэктэри үөрэх чааһыгар солбуйааччы Анна Винокурова атыыһыт, меценат Н.О. Кривошапкин олоҕун-дьаһаҕын туһунан кэпсээн, дьиэтин-уотун көрдөрөн, аатырбыт биир дойдулаахпыт туһунан бэрт интэриэһинэйдик сырдаттылар.
Биһиги бу уруоктан элбэх саҥаны биллибит. Кырбааһаҥкын туттубут малын-салын тутан-хабан көрдүбүт. Онтон бары олус астынныбыт, түмүккэ бары өйдөбүнньүк хаартыскаҕа түстүбүт.
Эльза Яковлева, 11-с кылаас, Өймөкөөн