Самаан сайыммыт кэнниттэн сири-дойдуну көмүс дуй кууспут, кыраһа хаар кылбачыйа сытар кэмигэр, Пантелеймон Тулааһынап аатынан Төрүт култууратын дьиэтигэр уонна олохтоох бибилэтиэкэҕэ дьоро киэһэ үүннэ. Саха Өрөспүүбүлүкэтин ийэтин күнүгэр «Бэйэҕин таптаа, ай-тут» диэн дьахтар аймахха анаммыт маастар-кылаастар дьону-сэргэни түмтүлэр.
Киирэр аантан сылаас эйгэ, минньигэс ас дыргыл сыта көрүстэ. Истиҥ иэйиилээх, итии үүттээх чэй иһэ-иһэ сэһэргэһии, сүбэ-ама атастаһыы — бу саха дьонун былыр-былыргыттан илдьэ кэлбит үтүө үгэспит.
Манна кэлбит ийэлэр, эбэлэр, эдэркээн кыргыттар күннээҕи түбүктэн быыс булан, дууһалыын сынньанан, бэйэ-бэйэлэрин кытта ирэ-хоро кэпсэтэн, олохтон үөрүүлэрин, муунтуйууларын үллэстэн, бары даҕаны уоскуйан, сааһыланан бардылар.
Тэрээһин биир тыынынан, олус дириҥ ис хоһоонноохтук ааста.
Бу курдук, Төрүт нэһилиэгин Далбар Хотуттара биир дьоро киэһэни атааран, дууһалыын сырдаан, кэрэни кэрэхсээн, билиини-көрүүнү эбинэн, саҥаттан саҥаҕа кынаттанан тарҕастылар. Маннык түмсүүлэр, истиҥ кэпсэтиилэр ийэ олоҕун киэргэтэ, дьолунан толоро турдуннар!
Бу туһунан сиһилии “Хотугу сардаҥа” хаһыакка ааҕыҥ.
Ньургуйаана Потапова, кулууп уус-уран салайааччыта, Төрүт