Киһи оһоллоноро ыраас халлааҥҥа этиҥ эппитинии эмискэ кэлэрэ чахчы эбит. Мин биир сайыҥҥы сарсыарда күн тахсыыта үөрэ-көтө тэлгэһэбэр ону-маны өрө тарпыта буола сылдьан, халтырыйан тас иэмминэн олоро түһэн, тоноҕоһум уҥуоҕун тосту түспүтүм.
Ону үрүҥ халааттаах аанньалларбыт суһал көмөлөрө, дьонум-сэргэм, ыкса ыалларым сылаас сыһыаннара түргэнник атахпар туруордулар.
Томтор нэһилиэгин учаастактааҕы балыыһатын суһал көмө сулууспатын үлэһиттэрэ уонна ол түүн Уус-Ньараттан кэлбит эмчиттэр миигин бүөбэйдээн улуус киинигэр илдьибиттэрэ. Суһал көмө суоппара Виктор Хабиев уһун ардахтар кэннилэриттэн алдьаммыт-кээһэммит айан суолун уустугун билиннэрбэккэ, сымнаҕастык айаннаабыта. Айан устата биэлсэр Герман Скрыбыкин миигин наһаа аһыммыт харахтарынан көрө-көрө сотору-сотору “хайдаххыный” диэн ыйытан, киһини долгутта да, уйадытта даҕаны. Түүн үөһэ Уус-Ньараҕа тиийэн, мин кэтэһэн олорбут быраастар илиилэригэр киирэн, сүөм түспүт санаам өрө көтөҕүллэ түспүтэ.
Улуустааҕы киин балыыһа хирургическай отделениетын исписэлиистэрин, техүлэһиттэрин састааба анаан талыллыбыт курдук. Бу дьон идэлэригэр, үлэлэригэр олус бэриниилээхтэр диэтэхпинэ сыыспатым буолуо. Ол курдук медсестралар Мария Готовцева 40-тан, Лена Цыренова 20-тэн тахса сыл идэтийэн үлэлээбит исписэлиистэр, Ганулиана Аммосова, санитарка Каухар Усанбекова эмиэ үтүө үлэһит дьон. Кинилэр киһини долгутар амарах, сылаас сыһыаннара ханнык да эмтээҕэр ыарыыны күүстээхтик уталытар, санааны бөҕөргөтөр.
Табыллыы диэн эмиэ баар буолар эбит. Мин балыыһаҕа кылгас кэмҥэ солбукка үлэлии кэлбит хирург-ортопед Санжарбек Мамутов көрүүтүгэр киирбитим. Аны Томторго төттөрү кэлбиппэр быраастар биригээдэлэригэр хирург-ортопед баар буолан, ыйтан ордук хамнаабакка сыппыт киһи, тобуктарым моһуоктаабыттарын, хата, сүһүөхпэр укуол туруортаан абыраата. (Тобуктарбын хас да сыллааҕыта эндопротезирование оҥоттор диэбиттэрин ылыммакка сылдьыбытым).
Быйыл тыа сиригэр киин куораттан кэлбит быраастар мобильнай биригээдэлэрин дьон-сэргэ наһаа биһирээтэ. Кинилэр олохтоохтору бэрт наҕыллык, болҕомтолоохтук көрбүттэриттэн-истибиттэрин киһи барыта астынна, дьон махтала баһаам.
Ханнык баҕарар тэрилтэ үлэтэ салайааччыттан, иилиир-саҕалыыр үлэһиттэриттэн, атыннык эттэххэ, кабинетыттан тутулуктаах буолара биллэр. Улуустааҕы киин балыыһа кылаабынай бырааһа Ираида Харлампьева исписэлиистэри оройуон киинигэр, учаастактарга бэркэ аттарбыт диэн түмүккэ кэллим. Ираида Ивановна солбуйааччылара Нина Хамнуева, Марина Ядреева дьоҥҥо сыһыаннара истиҥэ сөхтөрдө. Ыарыһаҕы көрүү-истии бары өттүнэн үчүгэй. Мин элбэхтэ араас балыыһаларга сыппыт киһи куукуна эппиэттээх үлэһиттэригэр, повардарга ыарыһахтар күннээҕи аһылыктарын араастаан тумалаан-тупсаран, санааларын ууран минньигэстик астыылларыгар махтаныахпын баҕарабын.
Айыы санаалаах, үрүҥ халааттаах аанньалларбар, ыкса ыалларбар, эдьиийдии-балыс Екатерина, Парасковия Семеновналарга, оҕолорбор, сиэннэрбэр сүһүөхтээх бэйэм сүгүрүйэн туран махтанабын уонна чиҥ доруобуйаны, бигэ тирэҕи, инникигэ эрэли, ситиһиини, табыллыыны түстүүбүн, ханнык да түгэҥҥэ санааҕыт самныбатын диэн баҕарабын. Сырдык күүс үтүө бэйэҕитин араҥаччылыы турдун, амарах санааҕыт алгыһынан эргийдин!
Марианна ТАРКОВА,
Томтор
Сиһилии «Хотугу сардаҥа» хаһыакка ааҕыҥ
Хаартыска: эрэдээксийэ архыыбыттан