Өймөкөөн нэһилиэгин олохтооҕо иитээччи идэлээх, бастыҥ оҕуруотчут Марианна Тырылгина сибэккини, оҕуруот аһын хаһан олордор табыгастааҕын, кини туох кистэлэҥнэрдээҕин туһунан кэпсээтэ, тэттик сүбэлэри биэрдэ.
— Дууһам сибэккигэ өрүүтүн тардыһар, кинитэ суох сатаан олоруо да суох курдукпун.
Дьиэм иһэ барыта сибэккинэн туолааччы. Ол курдук, сибэкки 31 араас көрүҥүн, 40-тан тахса угу олордор этим. Кэлин ону аччаттым. Сайын сибэкки элбэх көрүүнү-истиини эрэйэр. Сорох сибэккилэрбин үлэбэр – оскуола интэринээтигэр олордобун.
Сибэккини кулун тутар бүтүүтүгэр, муус устар саҥатыгар олордор ордук. Күн уһаатаҕына күнүс күн сардаҥата сырдыгы, сылааһы биэрэр. Ол иһин сиэмэтиттэн түргэнник тыллар.
Мин саас саамай эрдэ оҕурсу олордооччубун. Сиэмэтин буорга муус устарга быраҕабын. Оччоҕо ыам, бэс ыйыттан саҕалаан сибиэһэй оҕурсуну сиибит. Олунньуга ыспыт помидорбун, биэрэстэрбин о.д.а. үүнээйибин ыам ыйыгар өссө таһырдьа тымныы эрдэҕинэ буору ыраастаан, эмтээн баран, чесноктары, сүбүөкүлэни, моркуоптары кытта тэҥҥэ ыһан кэбиһэбин.
— Оҕуруотум аһын кыһыны быһа хаһаанан сиибин. Онно туспа араас элбэх ньымалары туттабын. Бу кыра сүбэлэрбин тускутугар туһаныҥ, — диэтэ уопуттаах оҕуруотчут.
Бу туһунан сиһилии “Хотугу сардаҥа” хаһыакка ааҕыҥ.
Евдокия Егорова