Өймөкөөн улууһугар бырамыысаланнас салаатын каадырдарын бэлэмнииргэ туһуламмыт үөрэх бырайыага саҕаланыаҕа.
«ОКТО Золото» УК» ХЭУо, СӨ Үөрэххэ уонна наукаҕа министиэристибэтэ, хайа-геологическай техникума, Өймөкөөн оройуонун үөрэх кыһаларын бииргэ үлэлээһиннэрин чэрчитинэн, «Будущие кадры ООО «УК «ОКТО Золото» бырайыак олоххо көхтөөхтүк киирэн эрэр. Бырайыак сүрүн сыала – оскуолаттан быһаччы сир баайын хостуур бырамыысаланнас салаатыгар тустаах исписэлиистэри бэлэмнээһин. Быйыл ыам ыйыгар үөрэх туһааннаах салайааччыларын кытта куйаар ситиминэн кэмпириэнсийэ ыытыллыбыта. Мунньахха бу бырайыагы олоххо киллэрии бары түһүмэхтэрэ сиһилии ырытыллыбыттара, үөрэх хаамыытын тэрийиигэ биир кэлим ньымалары тобулбуттара. Онон оскуола паартатыттан саҕалаан, сир баайын хостооһун салаатыгар анал идэлээх каадырдары бэлэмнээһин; оскуолаларга туспа үөрэх бырагыраамалаах идэтийбит кылаастары арыйыы; оҕолорго хайа бырамыысаланнаһыгар үлэлииргэ наадалаах билиини-көрүүнү уонна сатабылы иҥэрии – сүрүн сорук.
Ил Дархан Айсен Николаев уонна «ОКТО» бөлөх дириэктэрдэрин сэбиэтин бэрэссэдээтэлэ Алексей Толоконников былырыын анаан көрсөн, оройуон сайдыытын уонна производственнай-үөрэх бырайыактары сайыннарыы тосхоллорун ырыппыттара. Ураты болҕомто Уус-Ньара бөһүөлэгэр аныгы үөрэх тэрилтэтин тэрийиигэ ууруллубута. Бу өрөспүүбүлүкэ хотугулуу-илин эҥэригэр үөрэх хаачыстыбатын тупсарыыга улахан хардыынан буолуоҕа.
– Бырайыакка аныгы технологиялары олоххо киллэрии эмиэ көрүллэр. Бу көмүс хостуур тэрилтэлэргэ туттуллар аныгы ньымалары баһылыыр кыаҕы биэриэҕэ. Бүгүҥҥү күҥҥэ өрүттэр бииргэ үлэлээһин стратегическай хайысхаларын быһаарар бииргэ үлэлээһин сөбүлэҥэр илии баттастыбыт. Техникум үөрэх управлениетын уонна оскуола дириэктэрдэрин кытта кылаастарга уонна мастарыскыайдарга аналлаах тиэхиньикэ толору испииһэгин: бульдозер уонна экскаватор тренажердарын, интерактивнай дисплейдэри, минераллар хомуурунньуктарын, мультимедийнай куурустары, көмпүүтэр аныгы тэриллэрин, робототехника набордарын бэлэмнээн бигэргэттэ. Үөрэх кэмигэр баһылыыр идэлэр бастакы испииһэгэ эмиэ оҥоһулунна. Ол курдук, шахтер, химическэй анаалыс лабораториятын технигэ, конвейер оператора, дрон оператора уонна да атыттар. Үөрэх управлениетын салалтата уонна оскуола дириэктэрдэрэ, учууталлар, методистар кыттыылаах үөрэх бырагыраамаларын ырытыы салҕанар. Ордук болҕомто материальнай-техническэй өйөбүлгэ ууруллар: Уус-Ньаратааҕы «Пегас» оҕо сайдыытын уонна айар дьоҕурун киинигэр аныгы компьютернай лабораториялар тэриллиэхтэрэ. Бу хамсааһын үөрэх бары таһымын хабыаҕа – оскуола иннинээҕи саастан саҕалаан орто анал идэни баһылыыр үөрэххэ диэри бырамыысаланнас каадырдарын бэлэмнииргэ үлэ ыытыллыаҕа, — диэн улуустааҕы үөрэх управлениетын салайааччыта Константин Тимофеев бэлиэтээтэ.
«Бу бырайыак улус сайдыытыгар сүҥкэн суолталаах. Үөрэнээччилэр анал предметтэри дириҥник үөрэтэр эрэ буолбакка, бырамыысаланнас салаатыгар үлэлии сылдьар исписэлиистэри кытта көрсөр, маастар-кылаастарга кыттар кыахтаныахтара. Бу кинилэргэ инники идэлэрин сөптөөхтүк талан, дойдуларыттан ырааппакка үлэлээх буолалларыгар өйөбүл буолуоҕар эрэллээхпит», – диэн И.В. Хоменко аатынан Уус-Ньара орто оскуола дириэктэрин эбээһинэһин толорооччу С.М. Бурцев. Билигин хайа бырамыысаланнаһа үрдүк таһымнаах каадырдарга улаханнык наадыйар кэмигэр «ОКТО» бөлөх бырайыага бу боппуруоһу систиэмэлээхтик быһаарыаҕа: оскуола оҕолоро теоретическай билиини эрэ буолбакка, кыра саастарыттан олорор сирдэригэрүлэлиир бырамыысаланнас тэрилтэлэрин үлэлэрин-хамнастарын билэн улаатыахтара.
Өймөкөөн улуус дьаһалтатын пресс-сулууспата
Хаартыска: аһаҕас источниктан ылылынна