“Хоту дойду кэрэ кыыһа-2026” куонкурус бэстибээл чаҕылхай тэрээһиннэриттэн биирдэстэринэн буолла. Уус-Ньаратааҕы “Металлург” Култуура дьиэтигэр тэрээһиҥҥэ сыл бэлиэ дьаһалын бочуоттаах ыалдьыттара сырыттылар. Учуонай, геолог С.В. Обручев кыыһа Татьяна Сергеевна эмиэ бу эдэр саас, кэрэни кэрэхсээһин бырааһынньыгын сэргээн көрдө.
Куонкуруһу тэрийээччилэр – “Өймөкөөн улууһа” МО, “Уус-Ньара бөһүөлэгэ” ГП дьаһалталара уонна “Металлург” Култуура дьиэтэ. Манна улуус нэһилиэнньэлээх пууннарыттан аҕыс кыыс кэрэ сэбэритин, сатабылын, талаанын көрдөрдө.
“Хоту дойду кэрэ кыыһа-2026” куонкуруһу дьүүллүүр сүбэ чилиэннэрэ Туризм сайдыытын Агентствотын генеральнай дириэктэрин э.т. Александр Ермолаев, туроператор Күн Тыгыйык, урбаанньыт Анастасия Топор, тас дойдуттан ыалдьыт уонна Владивосток куораттан Анна Анпилогова сыаналаатылар.
Оттон спонсордарынан “Podo diamond” маникюр кабинетын хаһаайката Анастасия Топор, “Бастыҥ миэбэл” (Ярослав Атастыров), “IANAILS` (Саргылаана Кривошапкина), урбаанньыт Тамара Чороон буоллулар.
куонкурус бастакы түһүмэҕэ Индигир өрүс Муус пааркатыгар бэстибээли үөрүүлээх арыйыы чэрчитинэн ыытыллыбыта. Манна кыргыттар “Визитная карточка” диэн түһүмэххэ бэйэлэрин киэҥ араҥаҕа уратытык билиһиннэрбиттэрэ.
Куонкуруска кытыннылар:
Июлина Булдакова – Томтор нэһилиэгиттэн төрүттээх, кини идэтинэн юрист. Билигин Дьокуускайга уһуйааҥҥа үлэлиир. Кыыс Томтордооҕу оҕо ускуустубатын оскуолатын “Һэйм” үҥкүү бөлөҕөр сылдьыбыта, хас да төгүллээх улуустааҕы уонна өрөспүүбүлүкэтээҕи айар куонкурустар дипломаннара уонна лауреаттара буолбута.
Нарыйаана Максимова – Сордоҥноох нэһилиэгэ, кини билигин Дьокуускайга “Патриот” диэн ыччат киинигэр үлэлиир. Кыыс “Муус Устар” ыччат бэстибээлигэр ситиһиилээхтик кыттан, научнай үлэлэринэн бириистээх миэстэлэри ылбыта, араас Арассыыйатааҕы, аан дойдутааҕы таһымнаах куонкурустар кыттыылаахтара.
Ксения Ачкасова – “Металлург” КДь цирковой устуудьуйатын уһуйааччыта. Кини юрист үөрэхтээх, Арассыыйа уонна Черноземье үҥкүү куонкурустарын призера.
Кристина Неустроева – Томтор орто оскуолатын 11-с кылааһыгар үөрэнэр. “Инникигэ хардыы” НПК Бүтүн Арассыыйатааҕы уонна эрэгийиэннээҕи этаптарын хас да төгүллээх кыайыылааҕа. Улуустааҕы “Көмүс дорҕоон” куонкурус икки төгүллээх Гран-при хаһаайына, олоҥхоһут.
Саина Беляева – Төрүт нэһилиэгэ. ХИФУ медицинскэй институтун устудьуона. В.А. Местников аатынан грант хаһаайына, хайыһардьыт, ырыаһыт, үҥкүүһүт.
Даяна Тоскина – Томтордооҕу народнай тыйаатыр режиссера. Эрэгийиэннээҕи уонна улуустааҕы айар куонкурустар хас да төгүллээх кыайыылаахтара, призердара.
Акулина Кондакова Үчүгэй орто оскуолатыгар үлэлиир. “Инникигэ хардыы” НПК дипломана — Москуба, “Чысхаан ааҕыылара” улуустааҕы куонкурус Гран-при хаһаайына.
Злата Азарова – Уус-Ньара бөһүөлэгэ. “Пегас” оҕо айымньытын киинигэр үлэлиир. Улуустааҕы Олоҥхо ыһыаҕар, “Азия оҕолоро” спортивнай оонньууларга кыттыытын, улууска ыччат бэлиитикэтэ сайдыытыгар киллэрбит кылаатын иһин хас да төгүллээн махтал суруктарынан бэлиэтэммитэ.
Түһүмэхтэр түмүктэнэн, “Хоту дойду кэрэ кыыһын” быһаарар долгутуулаах түгэн тиийэн кэллэ. Дьүүллүүр сүбэ балайда күүттэрэн баран куонкурус кыттыылаахтарын сценаҕа ыҥыран тугу быһаарбыттарын иһитиннэрдэ.
“Хоту дойду кэрэ кыыһа-2026” аат Ксения Ачкасоваҕа ананна!”, — диэн ыытааччы биллэрээтин кытта, саала “оргуйа” түстэ, ытыс тыаһа тохтообокко салҕанна.
Онтон бастакы вице-мисс аат Июлина Булдаковаҕа иҥэриллибитин туһунан иһитиннэрии эмиэ дохсун ытыс тыаһынан арыалланна. Кыайыылаах кыыска Ксения Ачкасоваҕа улуус баһылыга Александр Оконешников 100 тыһ. солк. суумалаах, “Металлург” КДь дириэктэрэ Мадлена Николаева “Хоту дойду кэрэ кыыһа-2026” куонкурус бастакы вице-мисс Июлина Булдаковаҕа 50 тыһ. солк. суумалаах сертификаттары үөрэн-көтөн туран туттардылар.
Куонкуруска «Мисс Единство» аатын Злата Азарова, «Мисс Грация» — Даяна Тоскина, «Мисс Талант» — Кристина Неустроева буоллулар.
Куонкурус кэнниттэн Ксения Ачкасова санаатын маннык үллэһиннэ:
— Мин маннык таһымнаах күөн күрэскэ аан бастакыбын кытынным. Төрөөбүт-үөскээбит Уус-Ньарам уонна үлэлиир кэлэктиибим аатыттан кыттыым олус долгутуулаах этэ, миэхэ улахан эппиэтинэс сүктэриллибитэ. Барыта этэҥҥэ ааспытын кэннэ миигин махтал, үөрүү иэйиитэ кууста. Кыргыттар бары биир тылы булан, бэйэ-бэйэбитин өйөһөн сылдьыбыппыт кэрэхсэбиллээх. Бары да олус кэрэ, күүстээх, бэйэлэригэр эрэллээх кэрэ куолар. Онон төһө даҕаны кыайыахпын баҕарбытым үрдүнэн, саарбахтааһын баара.
Июлина Булдакова чугас дьонугар махталын тиэрдэр:
— Бастатан туран, миигин өйөөбүт аймахтарбар Соколовтарга, Булдаковтарга, ийэбэр Анастасия Ивановнаҕа ис сүрэхпиттэн махтанабын. Миигин бу куонкуруска кыттарга “Металлург” КДь уус-уран салайааччыта Татьяна Заболоцкая көҕүлээбитэ.
Мин аҕыйах ахсааннаах төрүт омуктар бэрэстэбиитэллэрэ буоларбынан киэн туттабын, эбээн норуотун аатыттан маннык үрдүк таһымнаах күөн күрэскэ кыттыбыппыттан олус үөрэбин.
Оҕо сааһым доҕоро Тимур Егоров уобараспын толкуйдуурга, тылбын-өспүн чочуйарга, таҥаспын-саппын таларга улахан күүс-көмө буолла.
Оннооҕор табаһыт убайым Петр Соколов бэстибээлгэ табаларын илдьэ кэлэн, мин «визиткабын» билиһиннэрэрбэр олус көмөлөстө. Биһиги аймах сүрүн сценаҕа таба сыарҕатыгар олорсон тиийбиппит, мин санаабар, ураты көстүү буолла. Бу ийэм идиэйэтэ этэ.
Аны Томтор нэһилиэгин баһылыга Алексей Винокуров айаным ороскуотун толуйбутугар махтанабын, нэһилиэгим “Сарыал” түөлбэтин олохтоохторо эмиэ күүс-көмө буолбуттарыттан олус үөрэбин.
Июлина ийэтэ Анастасия Соколова санаатын маннык үллэһиннэ:
— Куонкуруска кыттыбыт кыргыттар бары наһаа элэккэйдэр, олус талааннаахтар, бэйэ-бэйэлэригэр истиҥник сыһыаннаһан, түргэнник уопсай тыл буллулар. Мин түгэнинэн туһанан Татьяна Заболоцкаяҕа махталбын тиэрдэбин, кини миэхэ уонна кыыспар сибээскэ тахсан, куонкуруска кыттарга дьаныһан туран ыҥырбыта. Олох кылгас кэм иһигэр Июлина таҥастарын түүннэри-күннэри тигэн, улахан түбүккэ түспүппүт үтүө түмүктээх буолла. Уус-Ньараҕа олорор аймахтарбытыгар Евдокияҕа, Маринаҕа, күтүөттэрбэр улахан баһыыба. Аны убайым Петр ыстаадаттан кэлэн “балтыбын эрэ табанан киллэрэбин” диэн тылланан олус үөртэ. “Сарыал” түөлбэ дьонугар махтанабыт. Салайааччыбыт Надежда Кондакова көҕүлээн кыыспар харчынан бириэмийэ хомуйбуттарыттан олус соһуйдубут, үөрдүбүт.
Бу курдук бары биир сомоҕо буоларбыт туохтааҕар даҕаны күндү!
Любовь Кривошапкина
Ааптар хаартыскаҕа түһэриилэрэ