Нэдиэлэ ахсын ыытыллар былаанныыр мунньахха улуус баһылыга Александр Оконешников улуус бэрэстэбиитэллэрэ сэтинньи ортотугар анал байыаннай дьайыы зонатыгар уочараттаах командировкалара былааннанарын туһунан иһитиннэрдэ.
Онон ол кэмҥэ дылы улуус үрдүнэн харчы-үп уонна гуманитарнай көмө хомуура саҕаланна.
Тэрийээччилэр харчыны Өймөкөөн улууһа (оройуона) социальнай-экэнэмиичэскэй сайдыытыгар көмөлөһөр Пуондаҕа ыытарга көрдөһөллөр.
Расчетный счет: 40703 810 6 14001000001
ИНН: 1420002250
КПП: 142001001
Название Банка: АКБ «АЛМАЗЭРГИЭНБАНК» АО
БИК: 049805770
Кор. счет: 30101 810 3 00000000770
Төлөбүр анабыла «Благотворительная помощь участникам СВО».
Оттон гуманитарнай көмөнү (таҥас-сап, уһун кэмҥэ хараллар ас-үөл, медикаменнар, киэҥник туттуллар маллар) сэтинньи 10 күнүгэр диэри Уус-Ньаратааҕы “Металлург” Култуура дьиэтигэр туталлар.
Сэтинньи 4 күнүгэр бэлиэтэнэр Норуот сомоҕолоһуутун күнүгэр улуус киинигэр аһымал кэнсиэр уонна ас-үөл дьаарбаҥката ыытыллар.
Хомуллубут харчыны-үбү уонна гуманитарнай курууһу Өймөкөөн улууһун бэрэстэбиитэллэрэ буойуннарга тиэрдиэхтэрэ.
Улуус баһылыгын социальнай боппуруостарга солбуйааччыта Прасковья Аммосова салайар Өймөкөөн улууһунааҕы анал байыаннай дьайыы кыттыылаахтарын уонна кинилэр дьиэ кэргэннэрин өйүүр Ыстаап былааннаахтык үлэлиир.
Бу нэдиэлэҕэ Ыстаап уочараттаах мунньаҕа буолан ааста. Онно АбДь кыттыылаахтарын чугас дьонуттан киирбит 5 сайабылыанньаны көрдүлэр. Үбүлээһин, биллэрин курдук, улуус социальнай-экэнэмиичэскэй сайдыытын Пуондатын суотуттан оҥоһуллар. Пуондаҕа киирэр харчы-үп уонна ороскуот туһунан иһитиннэрии тиһигин быспакка муниципалитет официальнай саайтыгар сырдатыллар. Пуонда суота сүрүннээн бырамыысылыннас тэрилтэлэрин үптэринэн хаҥатыллар. Прасковья Егоровна бэлиэтээбитинэн, киирбит сайабылыанньаларынан көмөнү оҥоруу поселениелар дьаһалталарын кытта бииргэ оҥоһуллар. Ол курдук “Уус-Ньара бөһүөлэгэ” ГП дьаһалтата сыл саҕаланыаҕыттан АБДь буойуннарыгар араас тэрили уонна тиэхиньикэни атыылаһарга 4,5 мөл. солк. көрдө.
Бу күннэргэ анал байыаннай дьайыы кыттыылааҕыттан С.М. Кочемастан Өймөкөөн улууһуттан гуманитарнай көмөнү уонна УАЗ массыынаны туппуттарын туһунан иһитиннэрии кэллэ. Кини уонна бииргэ сулууспалыыр буойуттара Өймөкөөн дьонугар барҕа махталларын тиэртилэр.
Бу аахсыйаны “Полюс добра” диэн АНО салайааччыта, улуус киинин биир көхтөөх олохтооҕо Владислав Житенев көҕүлээбитэ. Аахсыйаҕа улуус элбэх олохтооҕо кытынна. Кулун тутар ыйыгар АБДь зонатыгар тиэрдиллибит гуманитарнай курууһу хомуйууга урбаанньыт Роман Егоров, “Саха-Золото” ХЭТ ыстарааталлырн артыаллара уонна Уус-Ньаратааҕы гимназия төрөппүттэр кэмитиэттэрэ аһымал дьаарбаҥка тэрийэн улахан күүс-көмө буолбуттара.
Оттон бу соторутааҕыта байыаннай дьайыы зонатыгар тиэрдиллибит гуманитарнай көмөлөөх массыынаны ылыыга тус кылааттарын киллэрбиттэринэн “Омега” уонна “Лазо” ХЭТ ыстарааталларын артыаллара, урбаанньыттар Кирилл Егоров, Байдам Жирков, Руслан Барабаш, Ирина Винокурова, улуустааҕы киин балыыһа, Уус-Ньаратааҕы И. Хоменко аатынан орто оскуола салалтата уонна кэлэктиибэ буоллулар. Оскуола улахан кылааһын үөрэнээччилэрэ хаххалыыр сиэккэлэри өрөн, оттон начаалынай кылаастар буойуттарга анаан сурук суруйдулар уонна уруһуйдарын ыыттылар.
Ити курдук тымныы полюһун олохтоохторо эйэлээх олох иһин туруулаһа сылдьар биир дойдулаахтарын уонна кинилэр чугас дьонун өйүүллэрин биир даҕаны күн тохтоппоттор. Бары буойуттар дойдуларыгар кыайыы көтөллөөх кэлэллэригэр эрэнэллэр.
Любовь Кривошапкина