Үчүгэй нэһилиэгин бибилэтиэкэрэ Наталья Громова иһитиннэрбитинэн, соторутааҕыта нэһилиэк кинигэни ааҕалларын сөбүлүүр дьиэ кэргэттэрэ кулууп дьиэтигэр өрөспүүбүлүкэтээҕи таһымнаах тэрээһиҥҥэ кыттаары муһуннулар.
Ол курдук кинилэр “Библиомаяк” диэн өрөспүүбүлүкэтээҕи оҕо ааҕыытын бэстибээлигэр тэйиччиттэн кытыннылар. Тэрээһин быйыл дойдуга, өрөспүүбүлүкэҕэ уонна улууска биллэриллибит бэлиэ дааталарга ананна.
Бэстибээл талааннаах дьиэ кэргэни киэҥ араҥаҕа таһаарарга уонна үүнэр көлүөнэ ыччаты патриоттуу өйгө-санааҕа иитиигэ туһуланна. Манан тэрилтэ дьиэ кэргэнинэн тэҥҥэ ааҕыы үгэһин сөргүтэн, бибилэтиэкэҕэ, нэһилиэк култуурунай олоҕун киинигэр, уопсастыба интэриэһин күүһүрдэр сыал-сорук туруорбута.
Тэрээһиҥҥэ маҥнайгы кылаастан саҕалаан 8-с кылааска үөрэнэр оҕолоох түөрт дьиэ кэргэн кытынна. Кинилэр литэрэтиирэҕэ сыһыаннаах ыйытыктарга хоруйдаатылар, айар дьоҕуру сайыннарар сорудахтары толордулар.
Оҕо уонна ийэ биир интэриэстээх буоллаҕына, инникигэ сайдыы барар, кинилэр сыһыаннарыгар саҥа сүүрээн үөскүүр диэн сыаналыахха сөп.
Биһиги корр.
Хаартысканы Н. Громова тиксэрдэ