Үчүгэй нэһилиэгинээҕи А.Н. Громов-Агди аатынан этно-култуурунай киин дириэктэрэ Аяна Эверстова соторутааҕыта нэһилиэккэ “Биракчаан” (“Үрүйэчээн”) диэн улуустааҕы үҥкүү куонкурус ыытыллыбытын туһунан кэпсээтэ.
Онно Өймөкөөн, Сордоҥноох, Томтор уонна Үчүгэй нэһилиэктэрин орто уонна кыра саастаах 41 оҕото кытынна. “Биракчаан” үҥкүү куонкуруһа бу бөлөҕү төрүттээччи, оҕону хамсаныынан кэрэҕэ уһуйааччы Валентина Баишева сырдык кэриэһигэр ыытыллар.
Валентина Баишева Үчүгэй нэһилиэгэр 10-н тахса сыл үлэлээн баран, Томтордооҕу Оҕо ускуустубатын оскуолатыгар “Һэйм” диэн үҥкүү бөлөҕүн эмиэ ситиһиилээхтик салайбыта. Кини чугас дьоно, аймахтара куонкуруска анал бириистэрин туруордулар. Маны тэҥэ кыайыылаахтары наҕараадалааһыҥҥа улуус өттүттэн үбүнэн көмө көрүлүннэ.
Орто саастаах кыттааччыларга Гран-при хаһаайынынан Өймөкөөн нэһилиэгин “Дьүөрэл” бөлөҕө буолла, салайааччы – Аксинья Гермогенова. 1-кы истиэпэннээх лауреат аатын Сордоҥноохтон Элеонора Аммосова салайар “Саһарҕа” кэлэктиибэ ылла.
Оттон иккис миэстэҕэ томтордор таҕыстылар – “Һэйм” (сал. Варвара Моссорина) үҥкүү бөлөҕө. Үһүс миэстэни Үчүгэй нэһилиэгин “Дьулуур” кэлэктиип ылла, салайааччы – Алевтина Дмитриева. 1-кы истиэпэннээх дипломант Үчүгэй кулуубун иһинэн үлэлиир “Нээрин” ансаамбыл (сал. София Филиппова) буолла.
Кырачаан үҥкүүһүттэр эмиэ хаалсыбакка, бириистээх миэстэлэргэ тигистилэр: “Умтичан” (сал. Ирина Винокурова, Үчүгэй) бөлөх бастаата уонна көрөөччү биһирэбилин бирииһин хаһаайына аатырда. 2-с миэстэҕэ өймөкөөннөр таҕыстылар, үсүһү томтордор ыллылар.
Үҥкүүһүт оҕо кэрэни кэрэхсии, сырдыкка талаһа үөрэнэр диэн мээнэҕэ эппэттэр. Онон маннык куонкурустар улаатан эрэр киһиэхэ кэнэҕэскитин олоҕор туһалаах, сэргэхтик тутта-хапта сылдьарыгар көмөлөөх буолаллара саарбахтаммат.
Любовь Кривошапкина