Быйылгы үөрэх дьыла учууталларга, иитээччилэргэ саҥа соруктары туруорда. Ол курдук Бүтүн Арассыыйа үрдүнэн оскуолаларга “Семьеведение” диэн саҥа куурус баар буолуоҕа. Үөрэх тэрилтэлэригэр нэдиэлэ аайы “Суолталааҕы кэпсэтии” диэн кылаас чааһыгар ыытыллыаҕа.
Н.М.Заболоцкай-Чысхаан аатынан Томтор орто оскуолатын үөрэх чааһын солбуйааччыта Антонина Егорова бэлиэтииринэн, үөрэх систиэмэтигэр сыл аайы оҕо сайдарын туһугар араас балаһыанньаны учуоттаан, үгүс уларыйыы киирэр.
Томтор орто оскуолатын маҥнайгы кылааһын үөрэнээччилэрэ
Холобур, үөрэнээччини кыра сааһыттан үлэҕэ сыһыарарга, иитэргэ үлэ уруогун бырагырааматын эбии дьириҥэтэн, кэҥэтэн биэрдилэр. Билиҥҥи дьалхааннаах олоххо бэриммэккэ оҕо дойдутун, дьонун-сэргэтин хаһан баҕарар өй-санаа, эт-хаан өттүнэн көмүскүүргэ, бэлэм буоларга үөрэниэхтээх. Ол быһыытынан “ОБЖ” диэн уруогу «Основы безопасности защиты Родины» (ОБЗР) диэн уларыттылар. Ону тэҥэ 7-11-с кылаастарга «Вероятность и статистика» диэн саҥа биридимиэт эбилиннэ.
Информатизация олохпутугар күүскэ киирдэ, үөрэнээччи финансовай өттүнэн эмиэ үөрүйэх буолуохтаах, элбэҕи билиэхтээх-көрүөхтээх. Хас биирдии үөрэнээччигэ иитии боппуруоһа сытыытык турар боппуруос буолла. Онон бу хайысханан үлэ күүскэ барыахтааҕа ыйыллар. Ону таһынан өссө кэккэ саҥа ирдэбиллэр киирдилэр.
— Үөрэх кэмигэр оҕолор төлөпүөнү (смартфону) кылааска туһаналлара бобуллар. Оҕо эбэтэр учуутал олоҕор уонна доруобуйатыгар кутталы үөскэтэр ыксаллаах эрэ түгэннэргэ төлөпүөнү туттуохха сөп. Уруок кэнниттэн, сынньалаҥ кэмигэр эбэтэр остолобуойга үөрэнээччи смартфону туттара хааччахтаммат, — диэн быһаарда Антонина Прокопьевна.
Мария Николаева, Г.А. Кривошапкин аатынан Төрүт ортооскуолатын үөрэх чааһыгар солбуйааччы, иһитиннэрэринэн:
— Биһиги оскуолабыт быйылгы үөрэх дьылыгар агро-оскуола хайысхатынан үлэлиэҕэ. Онуоха үүнээйини үөрэтии, сылгыны иитии чаастара үөрэх таһынан киирдилэр. Маны тэҥэ «Основы безопасности и защиты Родины» диэн саҥа биридимиэт баар буолла. Технология биридимиэтэ “Труд уруога” диэн ааттанна. Ити биридимиэт ис тутула эмиэ уларыйда. Труд уонна ОБЗР учууталлара үөрэх бырагыраамата уларыйарынан сибээстээн, анал куурустары аастылар.
Өймөкөөн орто оскуолатын үөрэнээччилэрэ
Сордоҥноох орто оскуола үөрэнээччилэрэ
Евдокия Егорова