Биһиги 2016 с. үһүө буолан: Ариана Атласова, Полина Уткина уонна мин, кып-кырачаан оҕолор сибэкки дьөрбөтүн тутан, саҥа суумка сүгэһэрдээх аан маҥнай оскуола боруогун атыллаан киирбиппит. Оскуола иһэ сып-сырдык, киэҥ да киэҥ, киһи мунуох курдуга… Биһигини аан айаҕар бастакы учууталбыт Светлана Иннокентьевна Босикова үөрэ көрсөн, кылааска сиэтэн киллэрбитэ.
Светлана Иннокентьевна — ирдэбиллээх учуутал. Биһигиттэн чиэһинэй, толоругас буолары ирдиирэ, элбэхтэ кинигэ аахтаран, өйтөн суруйарга үөрэтэрэ.
Учууталбыт барыбытыгар биир тэҥник ийэлии сыһыаннаһара. Биир эмэ тэрээһиҥҥэ кыттаары гыннахпытынан атрибуттарбытын, көстүүмү даҕаны бэйэтэ булара.
Ити курдук оскуола иһинэн буолар тэрээһиннэргэ барытыгар кытыннарара. Кэнники улуус, өрөспүүбүлүкэ таһымнаах кэтэхтэн ыытыллар куонкурустарга кыттар буолбуппут.
Мин иккис кылаастан «Я — исследователь» билим-практическай кэмпириэнсийэҕэ кыттар буолбутум. Аан бастакы үлэм тиэмэтэ “Аһыйбыт үүт киһи доруобуйатыгар туһата” диэн этэ.
Оскуола иһинэн сыл аайы ыытыллар «Егоровскай ааҕыылар» диэн суруналыыс, кыраайы үөрэтээччи биир дойдулаахпыт кэриэһигэр ыытыллар куонкуруска кыттан бириистээх миэстэни ылабын. Биирдэ улуус хаһыатыгар ыытыллыбыт айар куонкуруска кыттан, “Хотугу сардаҥа” хаһыакка сыл аҥаардааҕы сурутуутун бэлэх ылан, эһэбин, эбэбин үөрдүбүтүм.
Итилэри таһынан мин бииргэ үөрэнэр оҕолорбун кытта үтүө үгэскэ кубулуйбут тыыл бэтэрээннэригэр аналлаах «Амарах сүрэх» аахсыйатыгар кыттааччыбыт. Биһиги учууталбытын кытары сыһыарыллыбыт бэтэрээммитигэр тиийэн ырыа ыллаан, хоһоон ааҕан, бэйэбит оҥорбут открыткаларбытын туттарааччыбыт. Онтон ким туохха наадыйарынан — хаар таһан, мас саһааннаан кэлэбит. Сороҕор төрөппүттэр көмөлөрүнэн өрүллүбүт сылаас үтүлүк, наскы бэлэхтиибит.
Светлана Иннокентьевна биһиэхэ дуобат куруһуогун ыытара.Биһиги хаста даҕаны Уус-Ньараҕа күрэхтэһигэ баран миэстэлэһэн, дьиэбитигэр үөрэн-көтөн кэлээччибит. Онно Таҥара дьиэтигэр, түмэлгэ экскурсияҕа сылдьааччыбыт.
Биһиги билигин 8-с кылаас үөрэнээчилэрэ буоллубут. Билигин да оскуола уопсастыбаннай олоҕор көхтөөхтүк кыттабыт. Быйыл мин С.М. Егоров-Кэрэспэндиэн Сэргэй төрөөбүтэ 70 сааһыгар аналлаах куонкуруска хоһоон ааҕыытыгар Брызгалов Роман Иванович-Абытай Арамаан сыдьааннара туруорбут бириистэрин хаһаайына буолан олус үөрбүтүм.
Билигин биһиги кылааспытын Людмила Егоровна Кривошапкина салайар, кини омук тылын учуутала уонна оскуола психолога. Бу ыстатыйабар ахтан аастпыт икки учууталларым иккиэн Саха Өрөспүүбүлүкэтин үөрэҕэриитин туйгуннара.
С.И. Босикова уонна Л.Е. Кривошапкина соторутааҕыта «Почётный работник образования РФ” үрдүк ааты сүктүлэр. Мин кинилэри истиҥник эҕэрдэлиибин, кытаанах доруобуйаны уонна махталлаах үөрэнээччилэри баҕарабын.
Миша АТЛАСОВ,
8-с кылаас,
Төрүт.