Урукку сылларга хас нэһилиэк аайы почта биир тутаах тэрилтэнэн буолар үтүө кэмнэрэ бааллара. Кэлин олох уларыйан, сорох тэрилтэлэр эстэн, ол иһигэр почталар эмиэ, уустук балаһыанньа үөскээбитэ биллэр.
Ол да буоллар, биирдиилээн нэһилиэккэ ылсыбыт дьыалаларыгар эппиэтинэстээхтик сыһыаннаһар үлэһиттэр аҕыйаҕа суохтар. Биһиги общественнай кэрэспэндиэммит Үчүгэй нэһилиэгин олохтоох дьаһалтатын эппиэттээх үлэһитэ Аграфена Аммосова Саха сиригэр биллэриллибит Үлэ сылын чэрчитинэн нэһилиэктээҕи почта үлэһитин туһунан сырдатта.
Бу нэһилиэккэ Анна Сивцева 2018 с. почтальонунан үлэлиир. Нэһилиэк почтальонун биир сүрүн соругунан биэнсийэни тиэрдии буолар. Ону тэҥэ киин сиртэн тэйиччи сытар кыракый нэһилиэк дьоно Анна Степановнаҕа тиийэн, олох-дьаһах коммунальнай өҥөлөрүн таһынан араас суолталаах төлөбүрдэри оҥорор кыахтаналлар.
Үчүгэйгэ өрөспүүбүлүкэтээҕи хаһыаттары, сурунааллары сурутар дьон бааллар. Почта үлэһитэ А. Сивцева ону барытын дьонугар тиэрдэр. Итини тэҥэ почтаҕа маҕаһыын сыанатынааҕар чэпчэки ас-үөл атыыланар буолан, олохтоохтор бородууктаны биир үксүн киниттэн атыылаһаллар.
Ону сэргэ үчүгэйдэр каталог нөҥүө араас иһит-хомуос, таҥас-сап, кинигэ сакаастыыллар. Баһыылкалара кэллэ эрэ, үөрүүлээх кэһии курдук тутан дьиэлэригэр төннөллөр.
Анна Степановна үлэтин сөбүлүүр, үтүө суобастаахтык үлэлиир буолан, 2022 сыллааҕы былаанын толорон, үрдүкү салалтатыттан дипломунан наҕараадаламмыта да элбэҕи этэр.
Любовь Кривошапкина