Үлэ киһитэ өрүүтүн сыаналанар

Томтордооҕу модельнай бибилэтиэкэ үлэһиттэрэ соторутааҕыта  Маай – саас, эйэ, үлэ — бырааһынньыгар анаан, “Үлэ дьоно”  диэн тэрээһин ыытта.

Дьаһалга Томтор нэһилиэгин бастыҥ үлэһит дьонун ыҥыран, ахтыы киэһэтин тэрийдибит. Хас биирдии киһи ахтыытыгар, урукку кэмҥэ бука бары үлэ хаачыстыбатын туһугар туруулаһан туран үлэлиир  уонна үлэ дисципилиинэтин кытаанахтык тутуһар этибит диэн аҕыннылар.

Биһиги бибилиэтиэкэбит биир көхтөөх  ааҕааччыта,  Томтор нэһилиэгин олохтооҕо Егор Березкин тэрээһини олус сэргэхситтэ. Кини оскуоланы бүтэрэн баран “Өймөкөөн” сопхуоска оробуочайынан үлэлии сылдьан, хомсомуол кэккэтигэр киирбит. 1973 сыллаахха Сэбиэскэй аармыйаҕа ыҥырыллан, ытык иэһин толоро барбыт.  Егор сулууспаллаан кэлэн баран Өлүөхүмэтээҕи тыа хаһаайыстыбатын техникумугар электрик идэтигэр үөрэммит. Ол кэнниттэн дойдутугар кэлэн идэтинэн үлэлиир. Ол сылдьан эдэр, эрчимнээх киһи бүтүн Сэбиэскэй сойуус  үрдүнэн  аатырар БАМ  диэн комсомольскай тутууга барарга быһаарынар. БАМ быйыл 50 үбүлүөйүн бэлиэтээтэ.

  • Оччолорго Руслан Атласов хомсомуол оройуоннааҕы кэмитиэтигэр үлэлии сылдьара. Онон кини тэрийиитинэн Өймөкөөнтөн үс эдэр уолаттар: мин, Афанасий Жирков уонна Михаил Пичук бу улахан историческай суолталаах тутууга үлэлии барбыппыт. Мин бу тутууга уопсайа алта аҥаар сыл үлэлээбитим. Тимир рельсаны уурууга уонна тутууга сылдьыбытым. Амурскай,  Читинскэй уобаластарга, Чульман, Беркакит, Нерюнгри аэропортарын вокзалларын,  поезд деполарын, электроподстанция тутууларыгар үлэлээбиппинэн олус киэн туттабын. БАМ-ҥа  Сэбиэскэй сойуус  араас муннуктарыттан элбэх ыччат кэлэн үлэлиирэ. Бары биир дьиэ кэргэн курдук олус эйэлээхтик олорбуппут, өрө күүрүүлээхтик үлэлээбиппит-хамсаабыппыт. Билигин бочуоттаах сынньалаҥҥа олорон, оччотооҕуга араас омук  ыччатын  кытары алтыһан  үлэлээбит сылларбын билиҥҥээҥҥэ диэри олус истиҥник саныыбын, диэтэ Егор Березкин.

Үлэ күнэ көхтөөх күн,

Үлэ – чэбдик-чэгиэн буолуу атаһа

Үлэ  — доҕор,  атас түмсүүтэ

Үлэ — дьарык ситиһиитэ,

Үлэ – күүс дьоҕур эрэлэ

Үлэ – дьол соргу аргыһа!

Үлэни сөбүлээҥ,

Үлэ ситимин быһымаҥ,

Үлэни тиһэҕэр тиэрдэ сатааҥ,

Үлэ хаһан да бүппэт

Үлэҕитин таптааҥ,

Үлэҕитинэн киэҥ туттуҥ!

Бу  хоһоону   Степанида  Петровна  Иванова тэрээһиҥҥэ анаан суруйан баран, тэрээһиҥҥэ бэйэтинэн  кэлэн  ааҕан иһитиннэрбитин дьон-сэргэ сэргээтэ.

Сиһилии «Хотугу сардаҥа» хаһыакка ааҕыҥ

Татьяна БЕЛОЛЮБСКАЯ,

Томтордооҕу модельнай бибилэтиэкэ үлэһитэ

Читайте дальше