“Үөрэхтээһин” национальнай бырайыак үүнэр көлүөнэ кэлимник сайдарыгар киэҥ аартыгы арыйар.
Дойду бэрэсидьиэнэ Владимир Путин быйылгы дьылы РФ Дьиэ кэргэн, оттон СӨ Ил Дархана Айсен Николаев Саха сиригэр Оҕо саас сылынан биллэрбиттэрэ.
Н.М. Заболоцкай-Чысхаан аатынан Томтор орто оскуолата улуус биир бастыҥ тэрилтэтинэн аатырыан аатырар. Бу таас оскуола дьиэтэ “СӨ үөрэҕирии 2016-2022 сс. уонна 2026 с. былааннаах кэмҥэ сайдыыта” өрөспүүбүлүкэтээҕи судаарыстыбаннай бырагыраама иитинэн тутуллубута. Аныгылыы тутуулаах 220 миэстэлээх оскуолаҕа үөрэнэргэ, үүнэргэ-сайдарга усулуобуйа барыта баар. Томтор орто оскуолатын үөрэнээччилэрэ төрөөбүт улуустарын аатыттан Арассыыйа, өрөспүүбүлүкэ, улуус таһымнаах тэрээһиннэргэ ситиһиилээхтик кытталлар.
Өймөкөөн нэһилиэгэр өр тутуллубут оҕо саадын дьиэтэ түмүктэнэн, билигин улуус биир бастыҥ үлэлээх оҕо тэрилтэтин ахсааныгар киирэр.
Өймөкөөн улууһун педагогтарын быйылгы дьыллааҕы сүбэ мунньахтара соторутааҕыта “Өймөкөөн Тымныы Оройо” МТ оскуолатын уонна уһуйаанын базатыгар үрдүк таһымнаахтык ааспыта.
Өймөкөөн оҕолоро 2023 с. Томтор нэһилиэгэр ыытыллыбыт өрөспүүбүлүкэтээҕи Олоҥхо Ыһыаҕар көхтөөх кыттыыны ылбыттара.
Улуус педагогтара бары аныгы кэм ирдэбилигэр олоҕуран айымньылаахтык, ситиһиилээхтик үлэлииллэр-хамсыыллар. 2023 с. улууска Уһуйааччы уонна настаабынньык сылын чэрчитинэн араас улахан суолталаах тэрээһиннэр ыытыллыбыттара. Эдэр учууталлар Тымныы полюһугар үлэлии кэлиилэригэр усулуобуйа тэрийэргэ салалта өттүттэн тустаах дьаһал ылыллар.
Любовь Кривошапкина