Күнү-дьылы баттаһа Өймөкөөн сиригэр окко киирии саҕаланна. Үчүгэй нэһилиэгэр ынах сүөһүнү, сылгыны тутар ыал үгүс. Тыа сирин дьоно кыстыгы туоруурга сайын үтүөтүн көдьүүстээхтик туһанарга дьулуһар.
Сайын аайы Үчүгэй нэһилиэгэр сүөһүлээх, сылгылаах дьон оҕолуун-уруулуун бука бары кэриэтэ ходуһаҕа тахсаллар. Кинилэр айылҕалыын алтыһан, үлэни кытта сынньалаҥы дьүөрэлээн, кэми туһалаахтык атаараллар. От күргүөмнээх үлэтэ былыр-былыргыттан аймах-дьону биир өйгө-санааҕа ситимниир. Тыа сирин киһитин ытык сиринэн ходуһата буолар.
От үүнүүтэ билиҥҥи туругунан үчүгэй диэххэ сөп. Онон этэҥҥэ буоллаҕына үчүгэйдэр былааны таһынан оттуурга суоттаналлар.
Ол курдук, Иван Винокуров дьиэ кэргэнэ Олоҥхо Ыһыаҕын кэнниттэн тута кэриэтэ оттуу тахсыбыта. Кинилэри тэҥэ Александр Егоров, Семен Винокуров о.д.а. оҕолорунаан, сиэннэринээн, чугас дьонунаан күөх сирэмтэн сомсон, кыстыкка бэлэмнэнэллэр.
Эрдээксийэттэн: Санаттахха, улуус отчуттара быйылгы оттооһун сезонугар 3700 тонна күөх маассаны бэлэмниэхтэрэ. “Үчүгэй” ААУо, 14 моой отчуттар уонна 5 бааһынай хаһаайыстыбата холбоон 375 тоннаны оттуур соруктаахтар. Манна сайын устата ходуһаларга 60 отчут тахсара былааннанар.
Улуустааҕы Тыа хаһаайыстыба управлениетын кылаабынай зоотехнига Евдоким Кондаков иһитиннэрбитинэн, от ыйын 20 күнүнээҕи туругунан улуус үрдүнэн 64 тонна от кэбиһилиннэ.
Бу туһунан сиһилии “Хотугу сардаҥа” хаһыакка ааҕаарыҥ.
Аграфена Аммосова, Үчүгэй