Өймөкөөн улууһун Төрүтүттэн төрүттээх, улуус Бочуоттаах олохтооҕо Тамара Северьянова салайааччылаах «Индигиир» ансаамбыл кыттыылаахтара Дьокуускай куораттан алтыа буолан (бары сааһырбыт биэнсийэлээх дьон), Олоҥхо Ыһыаҕар Томтор нэһилиэгэр тиийбиппит.
Биһиги үс буолан Томторго ансаамбылбыт чилиэнэ Вера Сосина истиҥ, чугас табаарыстарыгар Мария уонна Любомир Сивцевтэргэ түспүппүт. Хаһаайыттар биһигини киэҥ-куоҥ улахан дьиэлэригэр үөрэ-көтө көрсүбүттэригэр айаҥҥа сылайан кэлбит дьон ис турукпут өрө көтөҕүллүбүтэ, сэниэ-күүс эбиллибитэ.
Бу ыаллар кыыстара Елена Любомировна Томтор нэһилиэгин дьаһалтатын үлэһитэ, күннэри-түүннэри ыһыах тэрээһинигэр сырытта. Сиэннэрэ кыыс Снежана оскуола үөрэнээччитэ, кини эмиэ Олоҥхо Ыһыаҕын арыллыытын сиэригэр-туомугар кыттар буолан, күнү быһа бэлэмнэниигэ сылдьар эбит.
Манна даҕатан эттэххэ, Томтор нэһилиэгин олохтоохторо оҕотуттан кырдьаҕаһыгар тиийэ бары үлэ-хамнас үөһүгэр, ыһыахха бэлэмнэнии тэрээһинигэр сылдьаллара.
Тиийбит күммүтүгэр Вера Сосина бииргэ үлэлээбит, алтыспыт дьүөгэлэрэ сынньалаҥ пааркатыгар биһигини кытта көрсүһүү тэрийдилэр. Көрсүһүүнү Раиса Березкина уустаан-ураннаан иилээн-саҕалаан ыытта. Бары да ырыаһыт, көрдөөх-нардаах, сэргэх дьон мустан, үөрэ-көтө хойукка дылы айылҕалыын алтыстыбыт. Биһигини Өймөкөөн сиригэр көрсүбүт Верабыт бииргэ үлэлээбит, алтыспыт дьүөгэлэригэр барҕа махтал буоллун!
Маны таһынан Ыһыахха Үчүгэй нэһилиэгин толору астаах түһүлгэтигэр мааныланан сынньанныбыт. Олохтоохтор аламаҕай сыһыаннара биһигини барыбытын сөхтөрдө. Ыһыах сабыллыытын кэнниттэн үчүгэйдэргэ кэлэн сынньанан, аһаан-сиэн сэниэ киллэриммиппит, дьоммут өссө айаҥҥытыгар ыһык диэн ас аҕалан биэрэн соһуттулар, олус диэн үөртүлэр.
Кэрэ айылҕалаах, ыалдьытымсах дьонноох, хоһооҥҥо хоһуллубут, ырыаҕа ылламмыт Өймөкөөн сиригэр-уотугар, бу дойду дьоһун-мааны дьонугар үйэттэн үйэлэргэ чэчирии-сайда тураргытыгар, этэҥҥэ олороргутугар ис сүрэхтэн баҕарабыт!
Бу туһунан сиһилии “Хотугу сардаҥа” хаһыакка ааҕаарыҥ.
Надежда Степанова, «Индигиир» вокальнай ансаамбыл кыттыылааҕа, Дьокуускай