Манна Уус-Ньара, Төрүт, Томтор уонна Сордоҥноох нэһилиэктэрин хамаандалара күрэстэстилэр. Ааспыт сылтан ыытыллар улуус киинин баһылыгын турнирыгар тыа сирин хамаандалара кэлэн кыттыбыттара кэрэхсэбиллээх.
Сордоҥноох курдук тэйиччи сытар нэһилиэк баһылыга Альберт Вензель эр дьон хамаандатын тэрийэн аҕалла. Төрүттэн үс хамаанда күрэхтэһиигэ кытынна. Спортсменнары баһылыктара Владимир Алексеев өйөөн сырытта. Бу нэһилиэктэн биир — эр дьон, икки — кыргыттар, орто саастаах далбар хотуннар хамаандалара ох курдук оҥостон кэлбиттэр.
Субуота күн “Чысхаан” споркомплекс иһэ ньиргийэн олордо. Ордук улуус киинин хамаандалара күүстээхтэрин, бэлэмнээхтэрин көрдөрдүлэр.
Уопсайынан, бары хамаандаларга баһылыктан саҕалаан араас эйгэҕэ үлэлиир-хамсыыр волейболу сөбүлүүр, успуорду өрө тутар дьон оонньоотулар.
Түмүккэ “Уус-Ньара бөһүөлэгэ” МТ дьаһалтатын Кубогын хаһаайынынан эр дьоҥҥо Уус-Ньара хамаандата буолла. Иккис миэстэни төрүттэр, үсүһү томтордор ыллылар.
Дьахталларга кыайыылааҕынан эмиэ Уус-Ньара хамаандата таҕыста, иккис бириистээх миэстэни Төрүт нэһилиэгин бастакы хамаандата ылла. Уонна эмиэ бу нэһилиэк иккис хамаандата үһүс миэстэ буолла.
Любовь Кривошапкина