«Внуки Победы. Ленинград» сүлүөккэ биир дойдулаахпыт кытынна

Олунньу 1 күнүттэн Саха сиригэр үгэскэ кубулуйбут сыл аайы тэриллэр патриотическай иитии биир ыйа (месячнига) саҕаланна. Ол чэрчитинэн үөрэх бары тэрилтэлэригэр өстөөҕү самнаран Ленинград блокадатыттан босхолооһун 80 сылыгар уонна дойдуга Аҕа дойдуну көмүскээччи күнүгэр итиэннэ Афганистантан сэбиэскэй   байыаннай чаастары таһаарыы 35 сылыгар анаммыт араас хайысхалаах дьаһаллар, аахсыйалар буолуохтара.

Соторутааҕыта Санкт-Петербург куоракка уонна Ленинград уобалаһыгар президент  Владимир Путин көҕүлээһининэн «Внуки Победы. Ленинград» диэн ааттаах норуоттар икки ардыларынааҕы сүлүөт ыытылынна. Онно Томтор нэһилиэгиттэн төрүттээх Хотугулуу-Илиҥҥи федеральнай университет историческай салаатын устудьуона, «Волонтеры Победы» хамсааһын регионнааҕы салаатын толорооччу дириэктэрэ Тимур Егоров кытынна. Киниттэн бу сүлүөт туһунан кэпсииригэр көрдөстүбүт.

— Санкт-Петербурга тохсунньу 25-29 күннэригэр Ленинграды кырыктаах фашист блокадатыттан босхолооһун 80 сылыгар анаммыт улахан тэрээһин буолан ааста. Манна 650 тыһ. киһи Россия 89 субъегыттан уонна 59 дойдуттан кытыннылар, — диэтэ Тимур.

— Сүлүөт үөрүүлээх аһыллыыта Ленинградскай уобалас Гатчина куоратын судаарыстыбаннай Гатчинскай дыбарыаhыгар буолла. Бэлиэтээн көрдөххө, оруобуна дьаһал аһыллыытыгар — тохсунньу 26 күнүгэр — Гатчина куорат 1944 сыллаахха Ленинградтааҕы кыргыһыы кэмигэр босхоломмут эбит. Бу аатырбыт кэрэ дыбарыаска араас кэмнэргэ улуу императрица Екатерина II кэргэнинээн Григорий Орловтуун, Павел I, Николай I, Александр III ыраахтааҕылар олоро сылдьыбыттар. Бу былыргы куорат устуоруйатын тэрээһин кыттыылаахтарыгар киэҥник сырдаппыттара олус кэрэхсэбиллээх.

«Волонтеры Победы» хамсааhын тэрийэр бары дьаһалларын мин өрүү сэргиибин, олус биһириибин. Ыытыллыбыт сүлүөт норуоттар икки ардылара статустаах буолан, суолтата уонна таһыма үрдүгэ сөхтөрдө. Сүлүөттэн мин бэрт элбэҕи иҥэринним, устудьуоннары кытта уопут атастастыбыт, үгүс саҥа кэллиэгэ табаарыстанным, билиибин-практикабын хаҥатынным. Мин сүлүөт чэрчитинэн  Гатчина оройуонун Зайцево бөһүөлэгэр улахан, таас Аҕа дойду сэриитин кэминээҕи эйэлээх дьоҥҥо анаммыт мемориал арыллыытыгар волонтердаатым. Бу суолталаах тэрээһиҥҥэ кыттыыны дойдубут президенэ Владимир Путин уонна Беларусь Республикатын президенэ Александр Лукашенко ыллылар. Ону тэҥэ РФ президенин көмөлөһөөччүтүн Владимир Мединскайы кытта көрүстүбүт.

Мин эһэм Тихомиров Алексей Васильевич, тыыл уонна үлэ бэтэрээнэ, Аҕа дойду Улуу сэриитин кэмигэр АЛСИБ Томтордооҕу аэродромугар үлэлээбитэ. Онон кини бу салгынынан суол үлэлииригэр сүҥкэн кылааттаах. Эһэбинэн киэн туттабын, кини сырдык аатын кэриэстээн оскуола оҕолоругар, ыччат дьоҥҥо элбэхтик сырдатабын.

— Миэхэ бу «Внуки Победы. Ленинград» тэрээһин умнуллубат түгэни бэлэхтээтэ. Сүлүөт кэмигэр Ленинград блокадатын оҕолорун, бэтэрээннэрин кытта көрсүһүүгэ кыттыым миэхэ улахан чиэс уонна умнуллубат өйдөбүл буолар, — диэтэ актыыбынай общественник Тимур Егоров.

Евдокия Егорова