Дьокуускайга үөрэх үлэһиттэрин тохсунньутааҕы мунньаҕар кыттыбыт Төрүт оскуолатын дириэктэрин иитэр үлэҕэ солбуйааччы, сүбэһит Варвара Дьяконова тохсунньутааҕы мунньах чэрчитинэн “Оҕо саас навигатордарын кыһыҥҥы оскуолата” диэн үөрэх сиэссийэтигэр анаан сырытта.
Кини кэпсээбитинэн, сиэссийэ бастакы күнэ «Моя история» түмэл пааркатыгар үлэтин саҕалаата. Манна өрөспүүбүлүкэбит араас муннуктарыттан үтүмэн үгүс кыттааччы үлэ-хамнас уопутуттан атастаһар, саҥа сүүрээннэргэ үөрэнэр соруктаах муһуннулар.
Тэрээһин «Оҕо саас навигатордарын кыһыҥҥы оскуолата» диэн федеральнай бырайыагы олоххо киллэрии чэрчитинэн ыччаты патриотическай өйгө-санааҕа иитиигэ туһуланан ыытылынна.
— Мин маннык улахан таһымнаах кууруска бастакыбын сырыттым. Манна олус актыыбынай, киэҥ көрүүлээх, мындыр өйдөөх уонна талааннаах учууталлар мустубуттар. Тэрийээччилэр оҕолору патриотическай тыыҥҥа иитии туһунан ордук чорботон кэпсээтилэр. Педагогтар дириҥ ис хоһоонноох лиэксийэлэри, бырайыактары интэриэһиргээн, сэргээн иһиттибит. Тэрээһиҥҥэ билбиппин-көрбүппүн туһанан, оскуолабытыгар эдэр учууталлары кытта бииргэ алтыһан үлэлээтэхпитинэ үтүө түмүктэр тахсыахтара диэн эрэнэбин. Бу уопуппун салгыы үлэбэр туһанар, интэриэһинэй дьарыктары ыытар соругу туруоруннум, — диэн өрөспүүбүлүкэтээҕи таһымнаах дьаһалга кыттыбыт Варвара Дьяконова санаатын үллэһиннэ.
Евдокия Егорова