Өймөкөөн улууһугар оттооһуҥҥа быйылгы былаан — 3660 туонна. Бу күннэргэ сорох хаһаайыстыбалар ходуһуларыгар тахсан, оттоон эрэллэр.
Биэрэк-Үрдэ учаастагын олохтоохторо Винокуровтар дьиэ кэргэн ааспыт нэдиэлэ ортотуттан чугастааҕы ходуһаларыгар тахсан, от үлэтин саҕалаатылар. Ыал хаһаайката Лариса Семеновна кэпсээбитинэн, кинилэр бу күннэргэ номнуо икки кэбиһиини туруордулар.
Винокуровтар кэтэх хаһаайыстыбаларыгар 40 хороҕор муостааҕы туталлар. Ол иһигэр 10 ыанар ынах.
– Дьолго, чугас баар ходуһабытыгар уу улаханнык киирбэтэҕэ эрээри, бэс ыйыгар курааннаан, манна даҕаны от үүнүүтэ мөлтөх соҕус, — диэн кэпсиир Лариса Семеновна. – Элбэх сүөһүнү кыстатар буоламмыт биһиги өрүүтүн хаар түһүөр диэри оттуубут. Онон бу үтүө күннэри баттаһа аҕабыт Иван Семенович номнуо хотуурун тыаһатта. Кини сыл аайы убайынаан, уолунаан, күтүөтүнээн от үлэтигэр күргүөмнээхтик ылсар.
Маны тэҥэ Биэрэк-Үрдүн учаастагын эмиэ элбэх сүөһүнү тутар ыаллара Слепцовтар ходуһаларыгар тахсан, кэлэр кыстыкка бэлэмнэнии үлэтин саҕалаатылар. Сотору кэминэн атын да хаһаайыстыбалар оттуу бараары ох курдук оҥостоллор.
Томтор нэһилиэгэр биирдиилээн отчуттар эмиэ ходуһаҕа киирэн эрэллэр. Үгүстэр от ситэ үүнэ илик буолан, 20-с чыыһыла кэнниттэн киириэхпит диэн суоттаналлар.
Бу туһунан сиһилии “Хотугу сардаҥа” хаһыакка ааҕыҥ.
Любовь Кривошапкина,
Евдокия Егорова