Уһуйааччылар суолталаах тэрээһиннэрин арыйыы сиэригэр-туомугар “Өймөкөөн Тымныы Оройо” МТ дьаһалтатын баһылыга, элбэх оҕолоох аҕа Павел Васильев кытынна. Үгүс туристары, маанылаах ыалдьыттары ыҥыра-угуйа турар нэһилиэккэ улуус 81 педагога муһунна.
Ыалдьыттары орто оскуола дириэктэрэ Екатерина Посельская уонна “Чуораанчык” уһуйаан сэбиэдиссэйэ Ньургуйаана Ефимова уруйдуу-айхаллыы көрүстүлэр.
Улуустааҕы Үөрэх управлениетын начаалынньыга Дина Фасхутдинова дьаһал кыттыылаахтарыгар эҕэрдэ тылын этэн туран, Өймөкөөн улууһугар 2024 сылы үөрэхтээһин эйгэтигэр Эбии үөрэхтээһин сылынан биллэриллэрин иһитиннэрдэ.
Педагогтар олунньутааҕы сүбэ мунньахтарын чэрчитинэн талааннаах уһуйааччыны өйүүр, бастыҥ уопуту тарҕатар уонна маастарыстыбаны үрдэтэр сыаллаах-соруктаах “Өймөкөөн улууһа” МТ дьаһалтатын баһылыгын граныгар куонкурустар ыытылыннылар — “Бастыҥ иитээччи-2024” уонна “Бастыҥ учуутал-2024”.
Иитээччилэр улуустааҕы куонкурустарыгар 7 педагог кытынна. Түһүмэхтэр быыстарыгар “Чуораанчык” уһуйаан иитиллээччилэрэ уонна иитээччилэрэ айар нүөмэрдэри туруорбуттара, күөн күрэһи ураты истиҥ тыыннаата.
Куонкурус кыттыылаахтара ордук “Дьиэ кэргэнинэн бииргэ” диэн түмүктүүр түһүмэххэ төрөппүттэри кытта үлэ араас ньымаларын туһаналларын чаҕылхайдык көрдөрдүлэр.
Ити курдук дьүүллүүр сүбэ быһаарыытынан кылаабынай бирииһи – “Өймөкөөн улууһа” МТ дьаһалтатын баһылыгын 35 000 солк. гранын “Чуораанчык” уһуйаан (Өймөкөөн) иитээччитэ Е. Спиридонова ылла. Оттон иккис миэстэҕэ Уус-Ньаратааҕы “Петушок” оҕо саадын иитээччитэ Л. Алексеева таҕыста. Кини 30 000 солк. суумалаах гранынан бэлиэтэннэ. Улуус киининээҕи “Сказка” уһуйаанын физкультураҕа инструктора А. Деменева үһүс миэстэни ылан, 25 000 солк. суумалаах гран хаһаайына буолла.
Үөрэх управлениетын начаалынньыгын тус гранын Үчүгэй нэһилиэгин “Тугутчаан” уһуйаанын иитээччитэ М. Атласова тутар чиэстэннэ. Бастыҥ видеонан бэйэни билиһиннэриини оҥорбут “Березка” уһуйаан (Уус-Ньара) иитээччитэ Ю. Федотова анал дипломунан наҕараадаланна. Куонкурус саамай чаҕылхай кыттааччыта, Томтордооҕу “Кэскил” оҕо саадын иитээччитэ К. Аммосова “Педагогическая находка” номинацияҕа тигистэ. Оттон Сордоҥноохтон “Кэнчээри” уһуйаан үлэһитэ Е. Борисова “В содружестве семей” номинация хаһаайкатынан буолла.
Учууталлар куонкурустарын биир уратытынан оҕолор дьүүллүүр сүбэлэрэ педагогтары туспа сыаналаабыта буолла. Манна Өймөкөөн орто оскуолатын үөрэнээччилэрэ Валентина Атласова, Күннэй Оконешникова уонна Петр Борисов киирдилэр.
Оҕолор иннилэригэр чэпчэкитэ суох сорук турбута, кинилэр куонкурус алта түһүмэҕин барытын көрөн-истэн бастыҥы талыахтаахтара. Түмүккэ, оҕолор биһирэбил бириистэрин Уус-Ньаратааҕы гимназия нуучча тылын уонна литэрэтиирэтин учуутала О. Климбищукка анаатылар.
Үөрэх управлениетын начаалынньыгын Д. Фасхутдинова тус гранын Төрүт орто оскуолатын история уонна обществознание учуутала А. Атласова уонна Сордоҥноох орто оскуолатын алын сүһүөх кылаастарын учуутала Е. Стручкова туттулар.
Учууталлар тыҥааһыннаах куонкурустарын түмүгүнэн 1-кы истиэпэннээх дипломунан эдэр учуутал Марианна Ксенофонтова наҕараадаланна. Кини Хотугулуу-Илиҥҥи федеральнай университеты ситиһиилээхтик бүтэрэн баран, Томтор нэһилиэгэр “Жилье” бырагырааманан физика уонна математика учууталынан 5 сылга үлэлии кэлбитэ. Кэрэхсэбиллээҕэ диэн, Марианна Ксенофонтова Өймөкөөн улууһун аатыттан учууталлар өрөспүүбүлүкэтээҕи куонкурустарыгар кыттар улахан чиэскэ тигистэ.
2-с истиэпэннээх диплом хаһаайынынан О. Климбищук ааттанна. Уус-Ньаратааҕы И. Хоменко аатынан орто оскуола начаалынай кылааһын учуутала А. Батоева 3-с истиэпэннээх дипломунан наҕараадаланна.
Сиһилии “Хотугу сардаҥа” хаһыакка ааҕыҥ.
Любовь Кривошапкина