Улуус баһылыгын отчуота: түмүк, инники тосхолу торумнааһын

Бу күннэргэ Өймөкөөн улууһун баһылыга Александр Оконешников оройуон нэһилиэктэринэн сылдьан, ааспыт сыллааҕы үлэ отчуотун ыытар.

Баһылыгы кытта улуус дьаһалтатын эппиэттээх үлэһиттэрэ сылдьаллар, бэйэлэрин эйгэлэринэн дьон туруорсуутун болҕомтоҕо ылаллар. Улууска суолталаах тэрээһин хайдах баран иһэрин туһунан баһылык Александр Оконешников маннык билиһиннэрдэ:

ААРТЫК. Бүгүҥҥү күҥҥэ манна 300-чэкэ киһи олорор. Олохтоохтор хаарбах уонна саахалланар туруктаах дьиэлэртэн көһөрүү боппуруостарын интэриэһиргээтилэр. Маны тэҥэ, сапыраапка ыстаансыйата, ОДьКХ боппуруостарын, турбалары, ититии тиһигин саҥардыы, хочуолунайы эбии хочуолунан хааччыйыы, интэриниэт төлөбүрэ, туризм сайдыытын боппуруостарын быһаарыыга Аартыгы эмиэ киллэрэргэ туруорустулар.

ТӨРҮТ.  Олохтоохтор айан суолун көрүү-истии наадатын, “Билайн” төлөпүөнүн сибээһэ сотору-сотору сүтэрин бэлиэтээтилэр.

Маны тэҥэ, култуура дьиэтигэр исписэлиис тиийбэтин, бэкээринэлэрэ суоҕун, байыаннай дьайыы кыттыылаахтарын дьиэ кэргэттэрин өйүүргэ анаан улуустааҕы сүрүннүүр исписэлиис наадатын туруорустулар.

Успуордунан дьарыктаныыга маат, хайыһар тиийбэтин бэлиэтээтилэр. Улуус таһымыгар спортивнай күрэхтэһиилэри чаастатык ыытарга эттилэр.  Төрүттэр экология боппуруостарын сытыытык туруорустулар.

Көмүс хостуур тэрилтэлэр Элги өрүскэ көмүс сууйар ууларын ыыталларын тохтотор уолдьаспытын бэлиэтээтилэр. Бу нэһилиэккэ араадьыйаны сарсыардаттан киэһээҥҥэ диэри истэр буолан, Саха араадьыйата олох үлэлээбэтин туруорустулар. Почта үлэлээбэтэ эмиэ ахтылынна.

ҮЧҮГЭЙ.  Отчуокка бөрө элбээбитин бэлиэтээтилэр. Онон бөртөлүөтүнэн кэтээн көрүү наадатын эттилэр. От кэмчи буолан, тиэйии хаһан саҕаланарын күүтэллэр. Фельдшер суох буолан, амбулатория үлэлээбэт.

Тыа сирин боппуруостарын муниципалитекка биэриигэ туһааннаах боппуруостары биэрдилэр. 60 миэстэлээх саҥа оскуола үлэтин саҕалаатаҕына хочуолунайы кыайыа суоҕун бэлиэтээтилэр.

СОРДОҤНООХ. Олохтоох амбулатория кыһалҕаларын ырыттылар. Бадараанынан эмтиир эбийиэк быһыытынан анаан тутуллубут дьиэ хас да сыл туһата суох турарын, эргэрэн эрэрин бэлиэтээтилэр.

Түөрт кыбартыыралаах дьиэ хаарбаҕынан ааҕыллар эрээри, атын олорор сир суох буолан, дьон олорорго күһэллэр эбит.

Нэһилиэк олохтоохторо улуустааҕы Дьарыктаах буолуу киинигэр учуокка турарга, үс күннээх үөрэҕи ааһарга уонна ыйга иккитэ бааргын биллэрэн отчуоттуур туһуттан Уус-Ньараҕа айанныы (айан ороскуота 8 тыһ. солк.) сатыыллар, онон Томторго киин филиалын арыйыахха диэн этии киллэрдилэр.

ӨЙМӨКӨӨН. Биэрэги бөҕөргөтүү уонна дамба тутуута – нэһилиэк олохтоохторун тыын боппуруоһа. Онон Индигиир өрүс өрүү халаанныыр буолан, олорор дьиэ туһаттан тахсара, суол, муоста алдьанара, уот лиинийэтэ уонна сибээс быстара бэлиэтэннэ.

Салгыы Өймөкөөн нэһилиэгин олохтоохторо улууска “каадыр тиийбэтин” учуоттаан, исписэлиистэри бэлэмниир педагогическай кылаастары тэрийэргэ этии киллэрдилэр. “Олохтоох каадыры эрдэттэн бэлэмнээһин – кэм  ирдэбилэ ”, — диэн бэлиэтээтилэр. Үгэс быһыытынан, “Өймөкөөн – Тымныы полюһа” диэн Саха сирин туристическай брендин хаһаайыннара Өймөкөөн оройуонун өрөспүүбүлүкэ Арктическай улуустарын састаабыгар  киллэрэргэ эбэтэр планетаҕа дьон олорор саамай тымныы сирин быһыытынан ураты статуһу биэрэргэ туруорустулар. Доруобуйаларын туругун чинчийээри  нэһилиэк олохтоохторо сырыы аайы улуус киинигэр эбэтэр куоракка айанныырга күһэллэллэрин эттилэр.

Онон Томтор балыыһатыгар лаборант ставкатын көрөн, анаалыстары ырааппакка, миэстэтигэр туттарарга уонна тиис бырааһын ыытыҥ диэн көрдөстүлэр. Салгыы оскуолаҕа спортивнай сааланы эбии тутар уолдьаспытын, оскуола оҕолоругар — научнай-практическай кэмпириэнсийэ кыттыылаахтарыгар айаннарын боппуруоһун кэлимник быһаарыы ирдэнэрин, оскуола интэринээтин саҥа миэбэлинэн хааччыйыы боппуруоһун, оту тиэйии ороскуотун оройуон толуйуутун туруорустулар.

Бу ыйыллыбыт боппуруостары хонтуруолга ыллыбыт. Үүммүт сыллааҕы былааммытыгар эбии сорук курдук ылынан үлэлэһиэхпит.

Тохсунньу 30 күнүгэр, чэппиэргэ, улуус баһылыга Александр Оконешников, улуус баһылыгын 1-кы солбуйааччы Алексей Федотов, тыа хаһаайыстыбатын управлениетын салайааччытын солбуйааччы Инна Яковлева тыа хаһаайыстыбатын үлэһиттэрин кытта көрсөн мунньахтаатылар, инники былааннары торумнаатылар.

Киэһэ Томтор нэһилиэгин олохтоохторугар улуус баһылыга 2024 сыллааҕы улуус олоҕун-дьаһаҕын билиһиннэрдэ, отчуоттаата.

Өймөкөөн улууһун дьалтатын пресс-сулууспата

Читайте дальше