Учуутал үөрэнээччитигэр элбэх саҥа билиини эрэ иҥэрбэт, кини инники олоҕо ситиһиилээх буоларын туһугар үлэлииллэр, кыһаллаллар.
Оннук уһуйааччылартан биирдэстэринэн Сордоҥноох орто оскуолатыгар биологияны үөрэтэр Мира Томтосова буолар. Мира Петровна 27 сыл педагог ыстаастаах, үрдүк категориялаах учуутал.
Учуутал үлэтэ, ыытар дьарыга айымньы кэриэтэ буоллаҕа. Хас биирдии уруок бэйэтэ туспа суоллаах-иистээх, саҥа айымньы үөскээһинигэр тэҥнээх. Ол быһыытынан Мира Петровна хас биирдии уруога интэриэһинэй буоларыгар, оҕо айар дьоҕура, тыла-өһө, санаатын табатык тиэрдэр, сайа этэр сатабыла сайдарыгар кыһаллар.
Мира Петровна үөрэнээччилэрэ өрөспүүбүлэкэ, улуус олимпиадаларыгар, билим кэмпириэнсийэлэригэр өрүүтүн ситиһиилээхтик кыттан, сыл аайы көрдөрүүлэрэ үрдээн иһэр. Кини элбэх бырайыак ааптарынан буолар. Уопуттаах учуутал сыллата ыытыллар өрөспүүбүлүкэтээҕи «Чыычаахтары аһатыҥ» диэн аахсыйаны ситиһиилээхтик тэрийсэр. Бу дьаһалга өрөспүүбүлүкэ араас муннуктарыттан оҕолор кытталлар, уруһуй, бэйэ оҥоһуктарын араас куонкурустара киирэллэр. Кыттааччы ахсаана элбээн иһэрэ кэрэхсэбиллээх.
Мира Петровна ону тэҥэ сайыҥҥы кэмҥэ «Үнүгэс» диэн экологическай хайысхалаах лааҕыры салайан үлэлэтэр. Манна 7-10-с кылаас үөрэнээччилэрэ дуоһуйан туран дьарыктаналлар. Лааҕыр сүрүн сыалынан оҕо айылҕаҕа харыстабыллаах сыһыанын иитии уонна научнай үлэҕэ сыһыарыы буолар.
М.П. Томтосова «Учууталлар Учууталлара» бэлиэ хаһаайына, СӨ Үөрэххэ уонна наукаҕа министиэристибэтин Махтал суругунан, Ил Түмэн Бочуотунай грамотатынан, үөрэх эйгэтигэр таһаарыылаах үлэтин иһин Д. Менделеев фондун мэтээлинэн наҕаарадаламмыта элбэҕи этэр.
«Учуутал идэтэ – суолдьут сулус, умуллубат чүмэчи. Оҕо үөрдэҕинэ тэҥҥэ үөрсэр, оҕо ситиһиитэ мин ситиһиим буоларынан, саҥа кэм киһитин инникигэ сирдиир, сайдар суолун салайсар, билиитин-көрүүтүн хаҥатыһар үлэҕэ кыттыһарбынан киэн туттабын. Өссө даҕаны кэнчээри ыччаты, үөрэх үрдүк чыпчаалыгар ыҥыра, угуйа турдарбын!», — диэн санаатын үллэстэр Мира Томтосова.
Бу туһунан сиһилии “Хотугу сардаҥа” хаһыакка ааҕаарыҥ.
Ольга Скрыбыкина