Ким баҕарар туһунан ахтыы суруйар судургу,чэпчэки буолбатах. Аймахпыт, атаспыт, уруубут, убайбыт, учуутал, Өймөкөөн Тарын Үрэҕиттэн төрүттээх Власий Семенович Кондаков туһунан бэрт кэмчи ахтыыбын аһан көрүүм.
Власий Кондаков кэргэним Балантыына ийэтин эдьиийин улахан оҕото. Онон чуп-чугас хаан-уруу аймаҕа, оҕо саастара бииргэ ааспыта. Оччотооҕу оҕолор – хоту дойду хоһууттарын ыччаттара кыыстыын-уоллуун тэбис-тэҥҥэ тэлэмээттэнэн, ууну-хаары ортотунан оймоон, үс мас күрүөнү үрдүнэн көтүөккэлээн, Аар айылҕа амтаннаах чөчөгөй салгынынан сайа тыынан улаатан силигилээн таҕыстахтара.
Былааһый, Тарын Үрэх оскуолатыгар олус кыһаллан үөрэммитэ. Оччотооҕу эр дьон учууталлар эрчимнээх, кытаанах такайыылара таах хаалбатаҕа, учуутал буоларга сыал-сорук туруорунан, улуу Өлүөнэ Эбэни уҥуордаан, Бүтэй Бүлүүгэ тиийдэҕэ. Төгүрүк түөрт сыл устата үөрэнэн, айылҕаттан муусукаҕа-дьүрүскэҥҥэ дьүккүөрдээх баҕата баһыйан, баян, духовой оркестр, саксофон кылаастарын кыайа-хото туппут биир тутаах устудьуон этэ. Быыһыгар кэпсээн, хоһоон суруйан айара истиэнэ хаһыатыгар тахсара. Кыратыттан кытыгырас, оҕотуттан ойуоккаһыт буолан, хайыһар, сүүрүү хамаандатын биир тутаах чилиэнэ буолара.
Власий үөрэҕин ситиһиилээхтик бүтэрэн, диплом тутан, төрөөбүт Өймөкөөнүгэр үлэлии кэлбитэ. Онтон харыс да халбарыйбакка, биир оскуолаҕа, биир нэһилиэккэ саха тылын, литэрэтиирэтин уонна ырыа учууталынан эҥкилэ суох үлэлээбитэ. Быыһыгар СГУ саха салаатыгар кэтэхтэн үөрэммитэ.
Былааһый сааһыт, балыксыт бастыҥа этэ. Саа ыларынан мэҥэ халлааҥҥа ааһар тылбыйар кынаттааҕы тыыннаахтаабат, аахтара түһэрэр үгэстээҕэ. Ол кэнниттэн халыҥ таастаах, эрэһиинэ бигэргэтиилээх ачыкытын кичэйэн сотторун мин, «дойду киһитэ», дуоһуйа, астына көрөрүм. Киниэхэ тэҥнээх ытааччы доҕоро, арааһа, «Кулуубунай Оппуонньа” эрэ буолуо. Куобаҕы даҕаны, туора мэнээк ойуппат буолара, сөп соҕустук орто уруһаахха уктан, симэн баран дьиэлиирбит. Индигир Эбэ эмис сүрүтэ, сиэллээх дьарҕаата, суон соһолооҕо остуолга мэлдьи кэлэрэ. Муҥхалаан, илимнээн, чыҥыыттаан дуоһуйа бултуурбут.
Оо, кэрэ да кэмнэр этилэрэ! Саҥа сылы саргылаахтык көрсүү, үөрэн-көтөн, ырыа-тойук ыпсарыыта, дьон-сэргэ көтөҕүллэрэ бу барыта оскуолаттан саҕыллан сайдан, үүнэн-үрдээн тахсара.
Власий Семенович үөрэппит-такайбыт оҕотунаан Липа Сивцева тылыгар оскуола гимнэ буолбут ырыаны айбыттара. Кини үөрэппит оҕолоро өрөспүүбүлүкэ үгүс оройуоннарыгар суруналыыс, кулууп үлэһиттэрэ, артыыс, тэрийээччи, салайааччы буолбуттара үгүс.
Үөрэҕирии туйгуна, биир дойдулаахпыт, убайбыт Власий Семенович Кондаков сырдык, ыраас мөссүөнэ биһиги тыыннаахпыт тухары кэрэ кэпсээн буола сылдьыаҕа.
Прокопий Ксенофонтов, Өймөкөөн улууһун Бочуоттаах олохтооҕо, үлэ бэтэрээнэ, Өймөкөөн