Саҥа дьылы көрсө хас биирдии нэһилиэк түмүк оҥостор, саҥа соруктары туруорунар. Ол курдук Төрүт нэһилиэгин баһылыга Владимир Алексеев 2024 сыл хайдах ааһан иһэрин туһунан маннык сырдатта:
— Төрүт нэһилиэгэр 2024 сылы этэҥҥэ түмүктээн эрэбит диэххэ сөп. Байыаннай дьайыы саҕаланыаҕыттан улууска көмө-тирэх буолуу хамсааһыныгар кыттыһабыт. Биһиги быйыл СВО-ҕа сылдьар уолаттарбытын өйөөһүҥҥэ күүскэ үлэлэстибит. Саас устата буойун дьоммут дьиэ кэргэттэригэр көмөлөһөн, оттор мас киллэттэрбиппит. Тыыл бэтэрээннэрин, аҕа саастаах олохтоохтору эмиэ умнууга хаалларбаппыт, кинилэргэ эмиэ мас киллэриллибитэ.
Чэбдигирдии-ырааһырдыы хайысхата быһаарыыны эрэйэр боппуруос. Ааһан эрэр дьылга улуустан үп-харчы көрүллэн, нэһилиэк сыбаалкатын, бөх-сыыс полигонун ыраастатан астардыбыт. Ону сэргэ эргэ гараж сирин бульдозерынан күртэрэн ыраастаттардыбыт. Итиэннэ саамай улахан ситиһиибит, үөрүүбүт диэн, быйыл «Халыма” трассатыттан Төрүт нэһилиэгэр тахсар 20-чэ км суолу сылы эргиччи сылдьар гына оҥордулар. Онон аны бу — быстах кэмҥэ туттуллар суол (дорога временного пользования) буолбатах. Инньэ гынан төрүттэр суолбут оройуон бүддьүөтүн бырагырааматыгар киллэриллэн, улуус өттүттэн өрөмүөннүүр-сөргүтүллэр үлэтэ ыытылла туруоҕа. Бу хас да сыллар усталарыгар туруорсуллубут, быдан өртөн быһаарылла сатаабыт кыһалҕабыт буолар. Аны кэлэр өттүгэр нэһилиэнньэ уонна олохтоох дьаһалта туруорсуутунан Төрүттүүр суолу өрөспүүбүлүкэ суолталаах буоларыгар көһөртөрөргө оройуон салалтата үлэлэһэр былааннаах.
Ааһан эрэр сылга нэһилиэк бары социальнай тэрилтэлэрэ үлэлэрин-хамнастарын эрдэттэн торумнаабыт соруктарыгар олоҕуран тэрийдилэр. Төрүт оскуолата быйыл 95 сыллаах үбүлүөйүн үөрүүлээх быһыыга-майгыга бэлиэтээтэ. Оҕону, ыччаты патриот, Ийэ дойдуга бэриниилээх гражданин буола улаатарыгар иитэн таһаарыыга бу үөрэх тэрилтэтин кылаата суҥкэн.
Үүнэр сылга сорукпут үгүс, ол туоларыгар, олоххо киирэригэр бары биир сомоҕо буолан турунуохтаахпыт. Нэһилиэкпит дьылҕатыгар санааларынан, сүрэхтэринэн кыһаллар дьоммутугар барҕа махтал буолуохтун.
Ирина Петрова