Бу күннэргэ РФ үтүөлээх учуутала, РФ уопсай үөрэхтээһинин бочуоттаах үлэһитэ, СӨ учууталларын учуутала, “Учуутал учуутала”, “Гражданскай килбиэн” бочуоттаах бэлиэлэрдээх СӨ култууратын туйгуна, СӨ үөрэҕириитин бочуоттаах бэтэрээнэ, Өймөкөөн улууһун Бочуоттаах олохтооҕо, кыраайы үөрэтээччи Мария Поликарповна Боярова 80 дьоһуннаах үбүлүөйдээх сааһын бэлиэтиир.
Ытыктабыллаах Мария Поликарповна, бэлиэ үбүлүөйгүнэн итиитик- истиҥник эҕэрдэлиибит!
Эн, тыа сирин учуутала, Өймөкөөн — Тымныы полюһун киэн туттуута буолаҕын. Үлэҕэ бэриниилээх буолуу холобура буолан, педагог быһыытынан куруук айымньылаах үлэҕэ сылдьаҕын, төрөөбүт Өймөкөөнүҥ историятын сырдатар үгүс кинигэни бэлэмнээн таһаартардыҥ. Учуутал киһи быһыытынан хас биирдии үөрэнээччигэр төрөөбүт ытык түөлбэтин, дойдутун Өймөкөөнүн дьиҥнээх патриота буоларга баҕа санааны уһугуннарбытыҥ, сайыннарбытыҥ. Эн төрүттээбит Литературнай түмэлиҥ улуус, өрөспүүбүлүкэ, Арассыыйа киэн туттуутунан буолла. Өймөкөөн улууһугар тэнийбит ГУЛАГ лааҕырдарын туһунан кырдьыктаах докумуоннары бу мусуой хомуйан, дьоҥҥо-сэргэҕэ иһитиннэрдэ, биллэрдэ. ГУЛАГ лааҕырдарыгар сылдьыбыт суруйааччылар уонна бэйиэттэр үгүс биллибэт уус-уран нэһилиэстибэлэрин бу түмэлтэн эрэ булуохха сөп. Ол да иһин эн, Мария Поликаровна, “За нравственный подвиг учителя” Бүтүн Арассыыйатааҕы куонкурус эрэгийиэннээҕи түһүмэҕин кыайыылааҕа буолаҕын. Литературнай-краеведческай мусуойга көрдүүр-чинчийэр үлэни ыыппыт оҕолор билигин өрөспүүбүлүкэҕэ норуот хаһаайыстыбатын араас салааларыгар ситиһиилээхтик үлэлии сылдьаллар. Маныаха эн ыччаттарбытын Ийэ дойдуга бэриниилээх буолуу тыыныгар иитииҥ — барыбытыгар бастыҥ холобур.
Мария Поликарповна, бу күннэргэ эн үөрэппит оҕолоргуттан, биир дойдулаахтаргыттан, эйиигинэн киэн туттар бар дьонтон 80 үбүлүөйдээх сааскынан эҕэрдэ бастыҥын, тыл үтүөтүн истэҕин. Эйиэхэ, төрөөбүт Өймөкөөммүт истиҥ патриотугар, барҕа махталбытын тиэрдэн туран, чэгиэн доруобуйаны, бэйэҕэр уонна чугас дьоҥҥор — оҕолоргор уонна сиэннэргэр дьоллоох, уйгулаах олоҕу баҕарабыт. Өрүү бүгүҥҥүҥ курдук күлэ-үөрэ, ис искиттэн сырдаан мичээрдээбитинэн айа-тута сырыт. Онуоха биһиги эйиигин өрүү өйүү сылдьарга бэлэммит!
«Өймөкөөн улууһа» МТ салалтата