Быйылгы 16-с өрөспүүбүлүкэтээҕи Олонхо Ыһыаҕа Тымныы полюһунан биллэр Өймөкөөн улууһун Томтор нэһилиэгэр «Айыы санаа айана» диэн ааттанан үрдүк таһымнаахтык ааста.
Кырдьык да, бу Олоҥхо Ыһыаҕар хорсун санаалаах эрэ дьон айаннаан тиийэр дойдута буолан биэрдэ! Ол курдук, Дьокуускай куораттан Өлүөнэ өрүһү өксөйөн Аллараа-Бэстээҕинэн Мэҥэ-Хаҥалас, Чурапчы, Таатта улуустарын таҕайан, Алдан эбэни туораан, Томпо улууһун нөҥүөлээн, киһи эрэ сөҕөр-махтайар, салла көрөр туруук очуос хайалар быыстарынан түһэр-дабайар сындалҕаннаах айанынан Өймөкөөн улууһун Томтор нэһилиэгэр кыра массыынанан айаннаан тиийдибит.
Анаабыртан тиийбит аҕыйах киһилээх дэлэгээссийэни Уус-Ньара бөһүөлэгин бэрэстэбиитэллэрэ үөрэ-көтө көрүстүлэр. Бөһүөлэк баһылыга Иван Максимов туох баар тэрээһиннэргэ бэйэтинэн сүүрэн-көтөн, дьонун кытта тэҥҥэ сылдьарын олус диэн хайҕаатыбыт. Бу киэҥ түһүлгэ биһигиттэн ураты, Нерюнгри, Мииринэй, Сунтаар курдук улахан улуустар элбэх ахсааннаах дэлэгээссийэлэрин кытта аһатан маанылаата.
Биһиги Анаабыр улууһун аатыттан Өймөкөөн улууһун уонна Уус-Ньара бөһүөлэгин баһылыктарыгар эҕэрдэ суругу кытта сэмэй бэлэхпитин туттардыбыт, музыкальнай эҕэрдэ тиэртибит. Хардары бэйэбит эмиэ өйдөбүнньүк бэлэх туттубут.
Олоҥхону өрө туппут, СӨ култууратын үтүөлээх диэйэтэлэ, аатырбыт режиссер Андрей Борисов, сценарист Майя Власьева туруорууларынан Олоҥхо уонна үҥкүү тыйаатырдарын артыыстарын күүһүнэн, олохтоох дьон кыттыһыыларынан Өймөкөөн олоҥхотуттан «Дугуйа Бөҕө» диэн олоҥхонон дьүһүйүү сүрүн тэрээһини арыйда.
Бу олус ураты, хатыламмат туруоруу дьон-сэргэ умсугуйбут болҕомтотун өссө дириҥник тарта, нохтолоох сүрэҕин таарыйда.
Иккис күҥҥэ араас түһүлгэлэринэн күөн көрсүү күрэхтэри кытта уран тарбахтаах иистэнньэҥнэр тикпит таҥастарын көрүү-көрдөрүү киин былаһааккаҕа ыытылынна. Манна аҥардас саха таҥаһын эрэ буолбакка, бу сырыыга аҕыйах ахсааннаах омуктар сүрүн таҥастара кытта көрүлүннэ.
Анаабыртан маастардар София Захарова, Афина Дарианова, Прасковья Попова тикпит таҥастара куонкуруска кыттыстылар.
Үгүс элбэх күөн көрсүһүүлэртэн хотугу многоборьеҕа бастакы, иккис миэстэлэри олохтоох ыччат ылбытыттан өймөкөөннөр өрөгөйдөрө өссө үрдээтэ. Онтон үһүс бочуоттаах миэстэҕэ Анаабыр уола Дьулус Туприн тиксэн, харчынан бириэмийэлэннэ.
Бачча ыраах Өймөкөөн курдук уустук суоллаах улууска күүстээх үлэ барбытын бэлиэтиэҕи баҕарыллар. Ыраахтан-чугастан кэлбит дьоҥҥо бары усулуобуйа бэркэ тэриллибит.
2023 сыллаах Олоҥхо Ыһыаҕын тэрийээччилэригэр, сүрүннээн култуура, успуорт салаатын бары үлэһиттэригэр, тэрийэр кэмитиэккэ, Өймөкөөн улууһун дьаһалтатыгар, бары нэһилиэктэр баһылыктарыгар, төрүт олохтоохторго барҕа махталбытын тиэрдэбит. Баҕарабыт барыгытыгар чэгиэн туругу, үүнүүнү-сайдыыны, эйэлээх-дьоллоох олоҕу!
Бу туһунан сиһилии “Хотугу сардаҥа” хаһыакка ааҕаарыҥ
Мария Попова-Сарыада, Анаабыр национальнай (дулгаан-эбэҥки) улууһуттан «Анаабыр уоттара» хаһыат общ.кэрэспэндиэнэ, СӨ култуура үтүөлээх үлэһитэ