Саха сиригэр Хоту дойду 39 төрүт аҕыйах ахсааннаах норуоттарыттан 5 олорор.
Кинилэр дьылҕалара боростуойа суох – планета саамай уустук климатическай усулуобуйалаах сиригэр көс олохтоохтор. Таба иитиитинэн, булдунан дьарыктаналлар. Соторутааҕыта Дьокуускайга Аҕыйах ахсааннаах норуоттар ассоциацияларын 8-с сийиэһэ ыытылынна, ол чэрчитинэн ахсынньы 7-15 күннэригэр араас туһааннаах тэрээһиннэр буоллулар.
— Өймөкөөн улууһуттан сийиэскэ биһиги үһүө буолан сырыттыбыт – мин, Үчүгэй нэһилиэгиттэн орто оскуола эбии үөрэхтээһинин учуутала Ирина Винокурова уонна “Осикат” аҕа ууһунан община салайааччыта Алексей Винокуров, — диэн кэпсээтэ Валентина Прокопьева, киинэ үлэтин бэтэрээнэ, «үрүҥ көмүс» волонтер.
Валентина Николаевна кэпсээбитинэн, сийиэскэ Саха сиригэр олорор аҕыйах ахсааннаах төрүт норуоттар, ууһунан олорор көс община социальнай өттүнэн өйөбүллэрин, төрүт дьарыктарын сайдыытын, таба иитиитигэр көрсөр кыһалҕаларын тустарынан уонна сүрүн кэпсэтии төрөөбүт тылы уонна култуураны харыстааһын, салгыы сайыннарыы туһунан ыытылынна.
Бу 124 делегаттаах дьоһун көрсүһүүгэ Ассоциацияны төрүттэспит, хара тэриллиэҕиттэн 34 сыл устата салайан кэлбит ытык киһибит Андрей Васильевич Кривошапкин дириҥ ис хоһоонноох тыл этэн, кэскиллээх санаатын дьонугар-сэргэтигэр тириэртэ.
Ассоциация үлэтэ устаабынан көрүллүбүт соруктарынан салалларын эттэ. Ол курдук, хотугу аҕыйах ахсааннаах төрүт омуктар бырааптарын уонна интэриэстэрин туруорсуу, социальнай-экэнэмиичэскэй, айылҕа харыстабылын, култуура уонна үөрэх сайдыытыгар тыҥаабыт кыһалҕалары быһаарыы буолар.
А.В. Кривошапкин хотугу төрүт норуоттар үгэс дьарыктарын, култуураларын, тылларын харыстыыр сорук турарын таһынан, көс дьон олоҕун усулуобуйатын тупсарарга, сайыннарарга туһаайыллыбыт социальнай миэрэлэр ирдэнэллэрин тоһоҕолоон бэлиэтээтэ. Сийиэс делегаттарын туруорсуулаах сытыы этиилэрин резолюцияҕа киллэрдилэр.
— Дьаһал бырагырааматыгар киирбитинэн быыстала суох семинардар, төгүрүк остуоллар, стратегическай сессиялар тэрилиннилэр, — диэтэ В.Н. Прокопьева. — Түмүккэ Аҕыйах ахсааннаах норуоттар Ассоциацияларын саҥа бэрисидьиэнэ талылынна, бу эппиэтинэстээх дуоһунаска Константин Роббек бигэргэннэ. Ассоциация старейшинатын саҥа бэрэссэдээтэлинэн Татьяна Сивцева, «Северянка» общественнай тэрилтэ, В.Г. Дьячков аатынан община салайааччыта, буолла.
Сийиэс кэмигэр Хотугу норуоттар төрөөбүт тылларын, литэрэтиилэрин уонна култууратын учууталларын бастакы сийиэһэ ыытылынна. Бу учууталлар бэйэлэрин ассоциацияларын бэрэссэдээтэлинэн Өймөкөөн нэһилиэгиттэн төрүттээх биһиги биир дойдулаахпыт, СӨ эбээннэрин бырабылыанньатын чилиэнэ Виктория Шумилованы таллылар, — диэн түмүктээтэ Валентина Николаевна.
Аҕыйах ахсааннаах норуоттар сийиэстэрин делегаттара тарҕаһалларыгар, бу сырыыга үлэ өссө күүскэ барыа диэн эрэнэбит уонна аныгыскы сийиэскэ диэри таһаарыылаах үлэни күүтэбит диэн бэйэ-бэйэлэригэр санааларын тириэрдэн, дойдуларыгар айаннаатылар.
