Олоҥхо саха норуотун тылынан уус–уран айымньытын саамай үрдүк чыпчаала, үйэттэн үйэлэр тухары көлүөнэттэн көлүөнэҕэ бэриллэн испит дириҥ ис хоһоонноох айымньыта буолар.
Быйыл Олоҥхо Дэкээдэтин чэрчитинэн М.К. Аммосов аатынан Хотугулуу-илиҥҥи Федеральнай университет, Олоҥхону чинчийэр научнай институт, СӨ Национальнай бибилэтиэкэтэ, СӨ Олоҥхо ассоциацията 1-кы өрөспүүбүлүкэтээҕи «Олоҥхо дьыктаана” диэн аахсыйаны биллэрбитэ. Аахсыйа сыала-соруга — сахалыы таба суруйуу үөрүйэҕин сайыннарыы уонна олоҥхо баай тылынан-өһүнэн билиини-көрүүнү кэҥэтии буолар.
Бу бэлиэ күн чэрчитинэн Өймөкөөн нэһилиэгин бибилэтиэкэтигэр Олоҥхо дьыктаана нэһилиэнньэ киэҥ араҥатыгар ыытылынна. Дьыктааны Н.О. Кривошапкин аатын сүгэр Өймөкөөн орто оскуолатын учуутала Людмила Репина суруйтарда. Ааҕыллар тиэкис — П.А. Ойуунускай “Дьулуруйар Ньургун Боотур” олоҥхотуттан быһа тардыы. Аахсыйаҕа Өймөкөөн нэһилиэгин бибилэтиэкэтин көхтөөх 16 ааҕааччыта кытынна. Кинилэргэ барыларыгар Туоһу сурук туттарылынна. Биир да алҕаһа суох суруйбут аахсыйа кыттыылаахтара анал Дипломунан наҕараадаланыахтара.
«Олоҥхо дьыктаана” аахсыйа кэнниттэн Арассыыйаҕа дьиэ кэргэн сылынан, Саха сиригэр Оҕо саас сылынан, Олоҥхо Дэкээдэтин чэрчитинэн олоҥхону дьиэ кэргэнинэн куолаан уонна биирдиилээн ааҕыы ыытылынна.
Бу тэрээһин кыттыылаахтара Чурапчы улууһун Сылаҥ нэһилиэгин биллэр олоҥхоһутун Николай Михайлович Дьяконов-Чөлөс “Аҕыс күннүк сири атаратын иһигэр хаалларар Айдаарыкы сиэр аттаах, айдааннаах үйэҕэ төрөөбүт Ала Хотоҕой” олоҥхотуттан быһа тардан аахтылар.
Олоҥхону куолаан аахпыт дьиэ кэргэннэртэн бастыҥынан ордук хомоҕойдук, уустаан-ураннаан ааҕан истээччигэ тиэрдибит Надежда Канаева уолунаан Давидтыын уонна кыыһын Күннэйи кытта аахпыт Аксинья Гермогенова ааттаннылар.
Оттон олоҥхону биирдиилээн Филипп Захаров, Сардаана Аммосова, Марианна Тырылгина, Александра Струкова аахтылар.
Олоҥхону ааҕааччыларга Туоhу сурук туттарылынна. Бу күн дьон-сэргэ көрүүтүгэр «Олоҥхо дойдутугар ыалдьыттаа» кинигэ быыстапката турда.
Ити курдук, дириҥ силистээх-мутуктаах, көлүөнэттэн көлүөнэҕэ бэриллэн иһэр баай култууралаах, дьиҥ итэҕэллээх, баай тыллаах саха омук буоларбытын олоҥхобут толору кэрэһилиирэ бүгүн өссө төгүл биирдэ бигэргэннэ.
Лилия СТАРКОВА,
бибилэтиэкэр,
Өймөкөөн